Saýalnamaǵa qatysqan reseılikterdiń jartysy, Keńes Úkimetinde bolǵan elderdiń ishinde Qazaqstandy jetistikteri mol el dep sanaıdy. Sońǵy jyldary bulaı oılaıtyndardyń qatary úsh esege kóbeıip keledi dep habarlaıdy eadaily.com. Bul týraly búkil reseılik qoǵam pikirin zertteıtin ortalyq dırektory Valerıı Fedorov 9 jeltoqsanda Qazaqstannyń táýelsizdigine 25 jyl tolýyna oraı uıymdastyrylǵan Halyqaralyq ǵylymı-tájirbıelik konferensıada «Qazaqstan reseılikterdiń kózimen: jetistikteri, máseleleri, múmkindikteri» baıandamasynda aıtty. Atalmysh konferensıa M.Lomonosov atyndaǵy MMÝ Azıa men Afrıka elderi Instıtýtynda  Reseıdegi Qazaqstannyń elshiliginiń uıymdastyrýymen ótti.

Baıandamada reseılikterdiń sońǵy bes jyldaǵy Qazaqstanǵa degen qarym-qatynasy týraly aıtyldy. Respondentterdiń 53% Qazaqstandy Reseıdiń senimdi seriktesi dep sanaıdy.

Reseı azamattarynyń Qazaqstan Prezıdenti Nursultan Nazarbaevqa degen senimi de artyp keledi. Reıtıńtiń paıyzdyq kórsetkishi – 32 den 45%. Integrasıalyq prosestiń baǵamy boıynsha reseılikterdiń 57% Belorýssıamen áriptestik qarym-qatynas ornatýdy durys dep sanasa, Qazaqstandy - 47% reseılik qoldady.

«Reseılikter kimdi baýyrlas el dep sanaıdy?» degen saýaldyń jaýaby tań qaldyrdy. Reıtıńtegi úshtikte slavándyq emes ulttardyń qatarynda tek qazaqtar bolǵan.

«Qazaqstan men Reseı tek memleketaralyq resmı qarym-qatynasta emes, halyq, ult, adamdar arasyndaǵy berik platformada negizdeledi» dep aıtty Valerıı Fedorov.