Aqtóbede urlanǵan munaıdy qylmystyq top Reseıge de tasymaldap otyrǵan. Olar qara altyndy kórshi elge jetkizý úshin jalǵan qujattar paıdalanypty. Bul týraly KTK habarlaıdy dep jazdy Stan.kz
Sondaı-aq, munaı qoryn saqtaýǵa janarmaı beketin jalǵa alyp, eki kompanıany memlekettik tirkeýden ótkizgen. Al munyń barlyǵyn quzyrly organdardaǵy adamdary iske asyrǵan kórinedi.
Munaı urlyǵyna qatysty qylmystyq top músheleriniń ár qıymylyn Erkin İzbasar baqylaýda ustap otyrǵan. Sotta oqylǵan aıyptaýda «Aǵaıyndy tórteý» serkesiniń aıtqanyn Muhamedánov, Sársenov jáne Qaıyrbaev buljytpaı oryndap otyrǵany kórsetilgen.
Sońǵy ekeýi urlanǵan munaıdy ótkizetin jer izdep, ony tasymaldaýdy óz moıyndaryna alypty. Otyz jastaǵy Nurbolat Qaıyrbaev júk kóligin aıdaı alatyn tórt aýyldasyn uıymǵa tartady. Al Erkin İzbasar bastaǵan toptyń jetekshileri barlyq suraqtardy jeke kezdesip sheship otyrǵan. Bul qıturqy árekettiń sheti bıyl sáýirde belgili bolypty. Urlanǵan 97 myń lıtr munaıdy Reseıge apara jatqan júk kóligi ustalyp, uıymǵa qatystylardy anyqtaýǵa sol septigin tıgizgen kórinedi.
Bul is boıynsha kúdiktilerdi ustaý áli jalǵasyp jatyr. Ázirge olardyń on ekisi ǵana qamaýǵa alynǵan.
"İzbasar qurǵan top uıymdasqan túrde, bir kisideı jumys istegen. Uzaq ýaqyt boıy qylmystaryn júzege asyrdy. Erkin İzbasar múshelerine atqaratyn isterin bólip berip, bárin aldyn ala josparlapty. Qylmystyq top músheleri bir-birimen tyǵyz baılanysta bolyp, telefon arqyly belgi berip, kezdesetin jerlerin aıtyp otyrǵan”, – deıdi Aqtóbe qalalyq sotynyń sýdıasy Zınaıda Shmırova.
Buǵan deıin Erkin İzbasardyń anasy ulynyń munaı urlamaq túgili, bıletke aqsha tappaı qınalyp ómir súrgenin aıtqan edi. Budan buryn Aqtóbede arnaıy operasıa júrgizilip jatqanyn habarlaǵan edik. Keıinirek jaǵdaıǵa qatysty UQK túsinikteme de bergen. Aqtóbedegi munaı urlyǵyn salafıtterge qatysy bar qylmys áleminiń atyshýly serkesi basqarǵany habarlandy.
