Shaǵyn quramda ótken kezdesý barysynda Qazaqstan men Izraıl seriktestiginiń basty baǵyttary talqylandy jáne saýda-ekonomıka, ınvestısıa, sondaı-aq ınovasıalyq tehnologıalar salalaryndaǵy yntymaqtastyqtyń negizgi máseleleri qarastyryldy. Bul týraly Aqordanyń baspasóz qyzmeti habarlady.

Taraptar kún tártibindegi meılinshe ózekti halyqaralyq jaıttar jóninde de pikir almasty.

Memleket basshysy Nursultan Nazarbaev B.Netanáhýdiń sapary barsha qazaqstandyqtar úshin aıtýly mereke – Táýelsizdiktiń 25 jyldyǵy qarsańynda ótip otyrǵanyn aıtty.

– Osy jyldarda Qazaqstan men Izraıl arasynda jyly qarym-qatynas saqtalyp keledi. Qazaqstanda turyp jatqan kóptegen evreı dıasporasy ókilderi men Izraıldegi qazaqstandyq qaýymdastyq halyqtarymyz arasyndaǵy syndarly qarym-qatynastyń dánekeri bolyp otyr, – dedi Qazaqstan Prezıdenti.

Memleket basshysy Qazaqstannyń Izraılmen iskerlik baılanystardy odan ári damytýǵa múddeli ekenin aıta kele, bul sapar ekijaqty qarym-qatynas aıasyn keńeıtýge tyń serpin beredi dep úmittenetinin bildirdi.

Izraıl memleketiniń Premer-mınıstri Qazaqstanǵa Táýelsizdik mereıtoıy qarsańynda kelgeni ózi úshin zor mártebe ekenin jetkizdi.

– Qazirgi kezde álem úlken ózgeristerdi bastan ótkerýde, qaýipsizdik salasynda kóptegen syn-qaterler paıda boldy. Sonymen birge bul ózgerister negizinen ekonomıkanyń kez kelgen salasymen tyǵyz baılanysty jańa tehnologıalardyń zor múmkindikterine jol ashýda, – dedi B.Netanáhý.

Premer-mınıstr Izraıldiń qaýipsizdik pen jańa tehnologıalar salasynda zor tabystarǵa jetkenine nazar aýdardy.

– Osyǵan oraı Qazaqstan damýynyń strategıalyq josparlary men Izraıldiń múmkindikterin eki eldiń ıgiligi jolynda ushtastyrýdy usynamyn, – dedi B.Netanáhý.

Memleket basshysy Izraıl Premer-mınıstriniń usynysy Qazaqstan tarapynyń josparlarymen úılesetinin atap ótti.

– Izraıldiń ınovasıa men jańa tehnologıalar salasyndaǵy jetistikteri bizge jaqsy tanys. Búginde 270 kompanıa ekonomıkanyń túrli salalarynda Qazaqstan kásiporyndarymen yntymaqtasa jumys júrgizýde. Siz usynǵan format boıynsha yntymaqtastyq ornatý týraly másele búgingi bıznes-forým aıasynda qyzý talqylanady dep oılaımyn, – dedi Nursultan Nazarbaev.