Búgin Bas prokýratýra Fransıa memlekettik keńesiniń izdeýde júrgen qazaqstandyq bankır Muhtar Áblázovti bosatý týraly sheshimine qatysty ustanymyn jarıalady, - dep habarlaıdy Qamshy.kz.

«Qylmystyq-is júrgizý zańnamalarynyń talaptaryna sáıkes, aıyptalýshy tulǵany qylmystyq qýdalaý ony sotqa tapsyrǵanǵa deıin jalǵasady. Sondyqtan, Qazaqstannyń Bas prokýratýrasy aıyptalǵan kez-kelgen tulǵany ustaý, tergeýdi aıaqtaý, sot tergeýi men keltirilgen shyǵyndy qalpyna keltirý úshin zańda kórsetilgen barlyq sharalardy qoldanady», - delingen Bas prokýratýra taratqan habarlamada.

Sondaı-aq, qadaǵalaýshy organ Muhtar Áblázovti Qazaqstan men Reseıden basqa birneshe Eýropa memleketteri de túrli qylmystary úshin aıyptap otyrǵanyn habarlady. Ol memleketterdiń ishinde Ýkraına, Shveısarıa da bar. al, Ulybrıtanıada ol 22 aıǵa bas bostandyǵynan aırylǵan.

Esterińizge salsaq, aǵymdaǵy jyldyń 9 jeltoqsanynda Fransıanyń memlekettik keńesi Áblázovti RF-ǵa ekstradısıalaý týraly sheshimniń kúshin joıyp, ony qamaýdan bosatqan bolatyn.

Áblázovti Qazaqstannyń quqyqqorǵaý organdary qarjy jymqyrdy, zańsyz jolmen tabylǵan kiristi zańdastyrdy, bank qarajatyn zańsyz paıdalandy, laýazymdyq mindetterin asyra paıdalandy, uıymdasqan qylmystyq top quryp, basqardy dep aıyptaýda.

«Áblázov pen onyń seriktesteri 7,5 mıllıard dollardan astam qarjy jymqyrǵan. Ony aıyptaý jónindegi qylmystyq is 160-tan astam epızodtan quralady jáne bizdiń tergeý tájirıbemizdegi kúrdeli ekonomıkalyq isterdiń biri bolyp sanalady. Bul istiń árbir epızody birneshe júz mıllıard teńge qarjy jymqyrý týraly málimetterden quralady», - delingen habarlamada.