Belgili telejýrnalıst Asqat Sadyrbaı áleýmettik paraqshasynda eldi shýlatqan Ninety one tobyna qatysty oıyn bildirip, olardyń jaqynda jaryq kórgen beınebaıanyna baǵa berdi. Birneshe kún buryn Ninety one tobynyń «Qalaı qaraısyń» degen ánine túsirgen beınebaıany jaryq kórgen bolatyn. Bul joly da qalyń oqyrman qatty synǵa aldy. Osy oraıda únsiz qalýdy jón kórmegen teleýrnalıstiń jazbasyn alyp-qospasyz nazarlaryńyzǵa usynamyz, dep habarlaıdy reactor.inform.kz

"Ninety one týraly ekinshi ret jazyp otyrmyn. Basqa jazatyn nárse joq pa, sony da áńgime qylyp, onsyz da problema jetedi, sonda siz sondaılardy qoldap, nasıxattap otyrsyz ba jáne t.b. osy saryndaǵy áńgimeler men negizsiz aıyptaýlar qabyldanbaıdy, birden aıtyp qoıaıyn.

Men mýzyka nemese óner synshysy emespin. Synshylar aldaǵy ýaqytta óz oılaryn aıta jatar. Olardyń aıtary meniń pikirimmen sáıkes kelmeýi de múmkin. Men «91» tobyna taǵy bir ret sholý jasap kórmekpin.

Menińshe NinetyOne  táýelsiz Qazaqstannyń estrada, mýzyka tarıxyna kiredi. Men olardy jaı ǵana top emes, bizdiń mýzykadaǵy bir qubylys der edim (artyq ketýim de, jańylysýym da múmkin, biraq sonda da). Bolashaqta olar týraly oqytýshylar stýdentterge sabaq aıtyp, dáristerde talqylaıtyn bolsa tańqalmaımyn.

Baıqasańyzdar qazir olardy jastar da, úlkender de biledi. Shúıirkelese qalsa mindetti túrde talqylaıdy. Qansha aı ótse de áli ózekti, qyzyq, erekshe. Top rezonans týdyrdy. Shyqqandaryna 1-aq jyl bolsa da kóp rette kásibı emes synǵa, dórekilik pen mádenıetsiz aıyptaýlarǵa ilige berdi.

Qaıtemiz, bizdiń estrada oryndaýshylary tyńdarmandy bir saryndy stıldegi kóshe, áýesqoı, toı ánderine ábden úıretip tastady. Jańa, sapaly, zamanaýı tyń dúnıeler shyǵa qoımady. Otandyq mýzyka ındýstrıasynda neshe jyldan beri mundaı revolúsıa bolmap edi. Kópshiliktiń úrke, shoshı qaraýy da sol sebepti. Olar jaıly aıtylatyn syndarǵa qarap otyrsam (shamamen) 98.9%-y emosıalar men qur aıqaı.
 
Men de ultymdy súıemin, men de ult bolashaǵyna alańdaımyn. Biraq sýbektıvti pikir men negizsiz, dáıeksiz synǵa, negatıvke qarsymyn. Qazir biz kıiz úıde turmaımyz, atpen júrmeımiz. HHİ ǵasyrda bárimiz zaman talabyna saı ómir súrýdemiz. Demek kez-kelgen máseleni órkenıetti eldiń azamaty retinde mádenıetti sóılesip sheshýge bolatynyn umytpaıyq.

Erbolatty tanımyn, biraq kórmegeli, sóılespegeli qaı zaman?! Sońǵy ret qashan kórgenim de esimde joq. Toptaǵy jigitterdiń bireýin de tanymaımyn, attaryn da bilmeımin. Eshkimniń advokaty nemese pıarshysy emespin. Postqa eshkim eshnárse tólegen joq.
Shyn júrekten, «91» tobynyń búgin «Qalaı Qaraısyń» dep atalatyn beınebaıanyn tamshaladym. Jigitter taǵy da meni moıyndatty. Mýzyka, aranjırovka, sapa, xareografıa óte jaqsy".