Deılı Meıl: «Pýtınge 48 saǵattyq últımatým jarıalandy»,-deıdi.
Devıd Kemeron, Angela Merkel jáne Fransýa Olland telefondaǵy áńgimelesýde, eger Máskeý eskertýge qulaq aspasa, Eýroodaq lıderleri jańa qadamdar jasaýǵa daıyn ekendigin aıtqan.
Brıtanıa Premeri Eýropanyń osy jolǵy daǵdaryp otyrǵanyn 1930 jyldardaǵy Gıtler dáýirindegi Eýropamen salystyrǵan.
Devıd Kemeron: «Endi bizdiń kúshimizdi kórsetetin kezek keldi».
Álem lıderleri MH17 jolaýshylar ushaǵy apaty haqynda Vladımır Pýtınge sońǵy eskertýlerin jasady,-deıdi «Deılı Meıl» keshegi aqparatynda. «Pýtınge 48 saǵattyq últımatým jarıalandy» degen taqyryptaǵy bul maqalada Germanıa, Fransıa jáne Brıtanıa lıderleri Ýkraınanyń shyǵysynda atyp túsirilgen ushaq jaǵdaıyn saraptaýǵa jiberilgen halyqaralyq mamandardyń oqıǵa ornyn jan-jaqtyly tekserýine Reseı men onyń qoldaýyndaǵy separatısterdiń kedergi keltirmeýin eskertkendigi jarıalanǵan. Devıd Kemeron, Angela Merkel jáne Fransýa Olland telefondaǵy áńgimelesýde, eger Máskeý eskertýge qulaq aspasa, Eýroodaq lıderleri jańa qadamdar jasaýǵa daıyn ekendigin aıtqan. Nıderlandynyń premer-mınıstri Mark Rútte telefonda Pýtınmen sóılesýden keıin: «Bul onyń oılanatyn eń sońǵy oraıy»,- dese, Eýroodaqtyń eń yqpaldy tulǵasy esepteletin Germanıa kansleri Angela Merkel Pýtınmen telefondaǵy sóılesýde ony sáıkesýge shaqyrǵan. Germanıanyń syrtqy ister mınıstri Frank-Volter Shtaınmaıer «Bild am Sonntag» gazetine bergen suhbatynda: «Máskeýdiń shynymen osy oqıǵaǵa baılanysty selbeskisi kelse, bálkim, bul onysyn dáleldeýge berilgen sońǵy oraı bolýy múmkin»,-degen ýáj aıtty. Keıbir aqparattarǵa súıensek Brıtanıa premeri Evroodaq lıderlerine: «Pýtınge áli de jumsaqtyq istep otyrsyńdar»,- dep «ókpe artyp» otyrǵan kórinedi. «Qazirge deıingi Eýroodaqtyń álsiz qadamdarmen shektelýiniń aqyry osyndaı tragedıaǵa soqtyryp otyr»,-deıdi Brıtanıa premeri. Onyń paıymynsha, qazirgi Eýropanyń jaǵdaıy 1930 jyldardaǵy Gıtler kezeńindegi Eýropamen qaraılas. «Bir qýatty el álsiz eldi álimjettilik istep jatqanda, kórmeske salyp, soqyrlanbaýǵa tıispiz! Biz súıtý kerek, búıtý kerek dep aýyzben oraq ora bermeýge de tıispiz! Biz Eýropa tarıhynaǵy qatelikterdi qaıtalamaýǵa tıispiz! »-deıdi ol. Devıd Kemeron: «Eger prezıdent Pýtın qazirge deıingi Ýkraınaǵa bolǵan qadamdarynan jazbasa, onda Batys pen Eýropa Reseıge túbegeıli jańa joldarmen jaýap berý kerekpiz.... Endi bizdiń kúshimizdi kórsetetin kezek keldi», - dep ashyq aıtyp otyr. Al, bul jaıynda AQSH prezıdenti: «Malaızıalyq ushaqtyń joǵalýy - qaıshylyqtyń aıaqtatatyn ýaqyty jetkendigin kórsetti»,-deıdi. Daýnıng-strıt ókiliniń aıtýynsha, Eýroodaqtyń úsh lıderi Ýkraınaǵa jiberilgen halyqaralyq mamandardyń ushaq apaty oryn alǵan aýmaqta budan keıin kedergilerge ushyramaýyn, olarǵa erkin saraptama jasaýǵa múmkindik berýin jáne aýmaqtaǵy separatısterdiń oqıǵa ornyn onan ary bylyqtyrmaýyn eskertken. «Ýkraınadaǵy separatısterdi halyqaralyq mamandarmen selbesýge jumyldyrýǵa prezıdent Pýtınniń róli zor»,-deıdi ol.
« Qazir búkil halyqaralyq qaýymdastyqtyń barlyǵy Reseıge qarsy dabyl qaǵýda. Qazirge deıin Reseıdiń Qyrymdy anneksıalaýy jáne Ýkraınada ornyqsyzdyq týdyrýyna beı-jaı qaraýdyń aqyry osyndaı saldarǵa soqtyryp otyr... Qazir búkil álemniń kózi Vladımır Pýtınge qadalýda»,-deıdi Brıtanıa syrtqy ister mınıstri Fılıp Hemmond.
ABC News-dyń aıtýynsha, AQSH memlekettik hatshysy Djon Kerrı: «Malaızıa áýe kompanıasynyń MH17 ushaǵyn atyp túsirdi dep boljanyp otyrǵan separatısterge Reseıdiń de qatysy bar ekendigin qýattaıtyn dáleldemeler kóp»,-deıdi. «Reseıdiń búlikshilerge kómek bergeni jáne buǵan tikeleı qatysqandyǵy týraly óte kóp aıǵaq-dáleldemeler bar»,-degen ol apat oryn alǵan aýmaqtaǵy separatıster ýkraınder emes, aqıqatynda orystar ekenin aıtady. Sonymen qosa, separatısterdi Reseıdiń qarýlandyryp, jattyqtyryp otyrǵandyǵyn da aıǵaqtaıtyn pármendi dálelder barlyǵyn da pash etedi. «Separatıster múrdelerdi kólikterdiń artyna basyp áketken jáne oqıǵa ornyn bylyqtyryp jibergen. Mine, bul, árkiminiń ashý-yzasyn týdyrýda. Dál qazir Reseı úshin naqty qadamdar jasaıtyn mezet. Máseleni kúrdelilestirý emes, sheshýge qadam jasaıtyn syn saǵaty»,-deıdi AQSH hatshysy.
ABC News-aqparatyna negizdelgende, bul týraly Malaızıa tarapy áýe laıner apatqa ushyraǵan aýmaqtyń búkildeı reseıshil separatısterdiń baqylaýynda ekendigin aıtyp, alańdaýshylyǵyn bildirýde. Senbi kúni Kıevke jetken 133 adamnan quralǵan malaızıalyq mamandar tobynyń oqıǵa oryn alǵan aýmaqta tekserý júrgizip, múrdelerge saraptama jasaı almaı otyrǵandaryn aıtqan. ABC News-dyń aıtýynsha, oqıǵa ornyndaǵy 193 múrde separatıster jaǵynan áýe laıner qulaǵan jerden 9 shaqyrym qashyqtaǵy Torezge áketilgen kórinedi. «Separatıster qutqarýshy qyzmetkerlerge 75 mınýt ýaqyt qana berýmen shektelip otyr,-dep aqparat taratty Ýkraına ulttyq qaýipsizdik keńesiniń ókili Andreı Lysenko. Al, CNN-dyqtar da apat bolǵan aýmaqtyń qatty bylyqqanyn jáne aýmaqty baqylaýda ustap otyrǵan separatısterdiń júıeli tártipsiz áreket jasap júrgenine kýá bolǵanyn jazǵan. «Onda naqty bir komandırdiń bar ekendigi baıqalmaıdy»,-deıdi EYQU qadaǵalaýshylarynyń ókili CNN-ge bergen suhbatynda.
«Deılı-Meıl», CNN, «Los-Andjeles Taıms», «The guardian» , «Fox News», «ABC News», « Vashıngton Post» gazetteriniń aqparattaryna sholý jasaǵan:
Talǵar Dálelǵazy
«Qamshy» silteıdi - qamshy.kz
