Túrkıa qazaqtarynyń kishi quryltaıynda bıylǵy fýtbol týrnıirindegi doda “Er Jánibek Batyrǵa" arnaldy. 1986 jyly irgesi qalanǵan "Túrkıa qazaqtary qory" bıyldan bastap, dástúrli túrde “Kishi quryltaı” ótkizetin bolyp otyr. 1997 jyly alys shetel qazaqtary arasynda alǵash ret Ystambulda kishi quryltaı ótkizýge muryndyq bolǵan "Túrkıa qazaqtary qory" arada 17 jyl ótkennen keıin kishi quryltaıdy jyl saıyn uıymdastyrmaq. Eýropa men Túrkıa sekildi alys shetel qazaqtary jastarynyń súıikti sporty - fýtbol. Quryltaılda jastar arasynda bereke-birlik pen yntymaqtastyqty nyǵaıtý barysynda fýtbol týrnıri uıymdastyrylýda. Jastardyń ulttyq jáne tarıhı sanasyn kúsheıtý barysynda týrnırde jeńiske jetetin komandalarǵa beriletin dodaǵa jyl saıyn Kenesary Qasymuly, Mahambet Ótemisuly, Ospan batyr, Álıhan Bókeıhan, Mustafa Shoqaı syndy qazaqtyń bir batyrynyń nemese memleket qaıratkeriniń atyn berý jóninde sheshim qabyldanǵan. Máselen bıylǵy dodanyń aty Qazaqstanda 300 jyldyǵy toılanýyna baılanysty “Er Jánibek batyr: Dostyq jáne baýyrlastyq dodasy” dep ataý uıǵarylǵan. 29-30 shilde kúnderi bolatyn fýtbol týrnırine Ystambul, Koná, Nıgde, Salıhlı qalalarynan 8 fýtbol komandasy qatyspaq.
Túrkıa qazaqtarynyń kishi quryltaıynyń úshinshi kúninde táńerten quryltaıǵa qatysýshylar Qazaqtardy Túrkıaǵa qabyldaýlaryna 62 jyl jáne Qazaqstan táýelisizdigin álemde birinshi bolyp tanýlaryna 23 jyl bolýyna baılanysty túrik halqyna alǵys sezimderin bildirý maqsatynda Basmınıstr Adnan Menderes pen Prezıdent Turǵyt Ózaldyń beıitterine baryp, Quran oqyp, duǵada bolady jáne gúl shoqylaryn qoıý rásimin ótkizedi. Sol kúni tústen keıin Túrkıa qazaqtarynyń kishi quryltaıynda sonymen qatar Túrkıa men Eýropadaǵy qazaq qoǵamdarynyń ókilderi men ǵalymdarynyń qatysýymen “Túrkıa qazaqtarynyń keshegisi, búgingisi, erteńgisi jáne atamekenmen Qazaqstanmen baılanystary” týraly quryltaı jınalysy da ótetin bolady. Túrkıa qazaqtarynyń kishi quryltaıy 31 shilde kúni keshkisin fýtbol týrnıriniń jeńimpazy bolǵan komandaǵa “Er Jánibek Batyr” dodasyn tapsyrý rásimi jáne konserttik baǵdarlamamen aıaqtalady.
