Burynǵy túrkiler arýaqtarǵa erekshe mán bergen. Islam dini arýaqqa qarsy emes. Qaıta eske alyp duǵada bolyp otyrýdy keńes beredi. Mine Túrkıa qazaqtary Oraza aıynda osy eki uǵymdy túıistiredi. Túrik qazaqtarynda árbir otbasy orazada bir aýzashar berýdi ózine mindet sanaıdy. Ár otbasy osylaısha oraza aıynda aýyzashar berýge kúsh jumsaǵandyqtan, Túrkıa qazaqtaryna kóbinde ózinin úıinde aýyz ashý buıyrmaıdy. Óıtkeni 30 kún orazada kún saıyn bir úıge aýyzasharǵa shaqyrylady. Mine bul orazanyn berekesi!

Bul aýzasharlar qur shaı berip aýyz ashqyzý qana emes. Bul aýyzasharlarda Quranǵa da qatty mán beriledi. Burynnan bala-shaǵa otbasy, jaqyn týystar oqyp bitirgen Qurnannyń hatym duǵasy istelip saýaby burynǵy ótken ata-babalardyń arýaǵyna baǵyshtalady. Bir úıdiń qojaıyny jaǵdaıy bolyp orazada aýyz ashqyzyp Quran hatym túsirmesede “áı seniń áken ólgen joq pa edi?” dep o dúnıege ótken týystarynyń arýaqtaryna arnap Quran oqytqyzbaǵany eskertiledi. Aýyzasharlardy úıi keń bolǵandar úıinde, keıde óziniń úıine sımaǵanda kórshilerdiń paterlerine de qonaqtar kirgiziledi. Al úıi keń bolmaǵandar Kazak Túrkleri Ýakfy (Túrkıa qazaqtary qory), Hoja Ahmet Iassaýı Ýakfy, Zıajan Qajy toı zaly syndy qoǵamdyq zaldarda nemese restorandarda aýyz ashqyzýyna bolady. Biraq úıden ashqyzǵandy qazaqtar kóbirek saýapty dep oılaıdy.

Sonymen Túrkıa qazaqtarynyń aýyzasharlarynda tórt maqsat oryndalady. 1. Aýzy berik adamdarǵa aýyz ashqyzyp saýabyna ortaq bolady. 2. Oraza Qurannyń jer betine túse bastaǵan qasıetti aı. Sondyqtan orazaǵa Quran aıy da dep aıtylady. Túrkıa qazaqtary oraza úshin Quran aýdarady. Sóıtip orazanyń Quran aıy ekeni eskeriledi. 3. Aýyzasharda molla shaqyrylyp aýdarylǵan Qurannyn saýaby ótken arýaqtarǵa baǵyshtalady. Munymen arýaqtar rıza etiledi. Óıtkeni qazaqta “óli rıza bolmaı, tiri baıymaıdy” deıdi. 4. Aǵaıyn týǵan aýyzasharda bas qosyp áńgimelesip týystyq qarym-qatnastar kúsheıe túsedi.

Biz de osy ári dinı, ári ulttyq osy saltqa saı jyl saıyn aýyzashar berip otyramyz. Keshede bıylǵy aýyzasharamyzdy berdik. 150 adam qatysty. Qonaqtardy 4 pater men terasqa ornalastyrdyq. Paterlerde apalar, apaılar, kelinder, qaryndastar, al er adamdar úıdiń tóbesinde terasta aýyz ashtyq. Alla nıetimizdi, orazamyzdy, duǵalarymyzdy qabyl alsyn. Ótken ata-babalarymyzdyń topyraǵy torqa bolyp jandary jannatta bolsyn! Áýmın.

Ábdýaqap Qara

"Qamshy" silteıdi - qamshy.kz