Keshe, ańdar týraly derekti fılmdi kórgen edim.
Ásheıinde, onsha mán bermeıdi ekenmin. Birin-biri jep jatqan jyrtqyshtyq tirlik, áıteýir.... Ań deımiz aý, solardan asyp bara jatqan nemiz bar? Birin-birimizdiń etimizdi jemesek te, aradaǵy aıyrmashylyq shamaly...Aıbatty dármensizge kún bermeıdi.
Dámdiniń bári myqtynyń enshisinde... Eń bastysy, kúshti álsizdi jep qoıady. Adamnyń ómiri mundaı emes dep aıta alasyz ba? Ańdardyń jyrtqysh áreketine qarap, bul tabıǵat zańdylyǵy deımiz. Al, adamnyń jyrtqyshtyǵyn nemen aqtaımyz? Qudaı bar! Talas joq... Al, ádilet she? Menińshe, Qudaıdyń oıynda ne baryn onyń ózinen basqa eshkim bilmeıtin sıaqty. Alla týraly túsinikterdiń bárin adamdardyń ózderi oılap tapqan...Qudaı jazasyn bersin deımiz... Kimdi jazalap jatyr? Qudaı saqtasyn deımiz... Qoldan jasalǵan asharshylyqta beıkúne qazaqtyń jartysy nege opat boldy? On ekide bir gúli ashylmaǵan palestınalyq sábıler nege malsha qyrylyp jatyr? Bes ýaqyt namazyn qaza jibermeıtin musylmandar top-topqa bólinip alyp, bir-birin nege baýyzdap jatyr? Ómir boıy uıattyń jetegimen ǵumyr keshken jaqsy adam nege erte qaıtys bolady? Kún saıyn bolyp jatqan jol apattarynda nege beıkúná sábıler kóp mert bolady? Zulymdyq jasaǵan adamdar nege baqytty ómir súredi? Osyndaı suraqtardy tize berseń shyǵa beredi, shyǵa beredi. Jaýap joq. R.S. Sektanttar men ýahabshylardyń jattandy sandyraqtaryn qajetsinbeımin."Jazyqsyz qan tókkenderdiń jazasyn tozaqta beredi nemese Jaratqan olardyń úrim-butaǵyn jazalaıdy" degen sáýegóılik te qabyldanbaıdy. Atyshýly nemis fashıseriniń nemere-shóbereleri eń baqýatty elde ertegideı ǵumyr keship jatyr. Ertadegi Evropanyń qandy qol qolbasshylarynyń urpaqtary - qazir órkenıetti elderdiń laıyqty aqsúıekteri bolyp otyr. Mıllıondaǵan halyqtyń (onyń ishinde aıaýly ana da, beıkúná sábı de kóp boldy) qanyn sýdaı aǵyzǵan Shyńǵys hannyń urpaqtary da babasynyń jaýgerligin maqtan tutpasa, aıyp kórip otyrǵany shamaly. Qysqasy, arǵy teginiń teris qylyǵyna qorlanyp jatqan eshkimdi kórmedim. Bul durys qubylys. Ata-anasynyń áreketine onyń bala-shaǵasy jaýapty emes. Al, onda jaýyzdyń ózi nege jazalanbaıdy? Siz onyń tozaqta maısha shyjǵyrylatyn aıtarsyz? Múmkin... Biraq, jemtigin kúısep jatqan arystan da, jolaýshylar ushaǵyn atyp túsirgen separatıst te, bireýdiń nesibesin tartyp alyp jatqan bizdiń sheneýnik te bul týraly oılanbaıtyn sıaqty. Qysqasy, ádilettik joq. Ony kóktegi kúsh ornatyp bermeıdi. Ony ózimiz ornatýym kerek. Ony ózimiz qorǵaýymyz kerek. Áıtpese, jyrtqysh ańnyń aýzyna túsken jemtikteı jutyla beremiz, jutyla beremiz... Aıtpaqshy, "qurbandardyń" qarǵysy da eshteńe sheshpeıdi aý, deımin... Óıtkeni, "jeńgender" qashan da bıikte. Sondyqtan shyǵar, olar ózderin KÓKKE jaqyn sezinedi. Oraza kezinde aıtylǵan ospadar oıyma ǵafý ótinemin!

(Serik Abas-SHahtyń "Facebook" álýmettik jelidegi paraqshasynan alyndy)