Eger de bireý SPID-tiń emin taptym dese ne bolar edi? Árıne, aıtqany aıdaı bolsa, Nobel syılyǵyn alǵan bolar edi. Bizge bul syılyǵyńyz qaıdam... «Aýyldaǵynyń aýyzy sasyq» demekshi, mundaı marapat bizge qaıdan buıyra qoısyn? Múbáda, men osy bir ǵasyr indetinen salmaǵy pálenbaı ese aýyr bolmasa, esh kemdigi joq sálafızm dertiniń shıpasyn taptym. Endi osy hıkaıany sizderge barynsha qysqartyp aıtyp bermekke talaptanyp kóreıin. Bárimizge de bes saýsaǵymyzdaı belgili bolsa da sáláfızm sımptomyna taǵy da bir toqtala keteıin.

Sáláfızm indetiniń jeńil túri:

Buǵan urynǵandar «yqylyq» tıgen adamdamdaı «astafıralla» men «mashalla» sózin qaı jerde qoldaný kerektigin esh aıyrmastan betaldy qoldana beredi. Máselen, siz bir adamnyń dúnıeden ótkendigi jaıynda «sol» adamǵa estirtip jatsyz delik. Ol oǵan esh oılanbastan «mashalla» dese buǵan bola ókpeleýdiń tipti de qajeti joq.

Sáláfızm indetiniń asqynǵan túri:

Bul «jaryqtyqtar» bilimdi óz betimen emes, ózderi qulaı sengen sheıhtarynan tyńdap úırengendikten, bularda jeke kózqaras degen atymen bolmaıdy. Sondyqtan da dóp-dóńgelek dúmshe keledi.
Bir qyzyǵy, osy jandardyń bosaǵasyna abaısyzda bas suqqan bolsańyz, álgi áýlekiler áıelin jasyryp álekke túsedi. Sol kezde mynadaı bir oı sanańda sart ete qalady eken. Osy nemeniń áıeli buzyq, ıa bolmasa kelgen qonaqtyń nıeti nashar ma degen. Áıtpese, áıelin jasyryp nesine ábigerge túsedi sonsha. Sodan keıin qaraptan-qarap ashýǵa boı aldyrady ekensiń. «Bul qaı ǵasyr, aı nadandyq-aı!» deısiń qapalanyp... 
Eger de eriniń jaq júni úrpıip balaǵy qysqaryp ketse, al áıel zatynyń beti búrkemelenip, qara jamylǵan bolsa, bul olardyń denesiniń ǵana emes sanasynyń da qysqaryp, qara jamylyp ketkendigin kórsetedi (Ata-baba tanymynan at tonyn ala qashyp, qazaqqa qatysty birdeńe deseń bolǵany «shırk» dep shyǵa keletinder de osylardyń sapynan ǵoı). Solaı desek te bul aýrýdan qulan taza qutylyp, saýyǵyp ketýdiń sara joly bar.

Arýdyń shıpasy (nemese reseptisi):

Bul indetke urynǵandarǵa tómendegideı keńes usynamyz. Osy sharttar tolyqqandy saqtalǵanda ǵana syrqattyń saýyǵyp ketetindigine júz paıyzǵa kepildik beremiz.
AQB men MJK dárisin kún qurǵatpaı bes ýaqyttan qoldanyp otyrýy tıis. Arasynda zamanaýı DKT men ZJB tunbalaryn da táýligine tórt retten tutynyp turýdyń eshqandaı da zıany joq. Osy indetti barynsha aýyzdyqtaýǵa kómektesetin em-domnyń biri ÁFI men HISI preparaty. Ásirese, HISI dárisin mólsherinen asyrmaǵan jón. Nege deseńiz, áseri óte kúshti. Eger de adam muny artyq qoldanǵan bolsa, onyń júregi kóterilip basy ońdy-soldy bulǵaqtap ózine baǵynbaı ketýi ábden múmkin. Osyny barynsha eskertkimiz keledi. Al aýyrǵan aǵaıyndar, qabyldaǵan em-domdaryńyz qabyl bolsyn. Jandaryńyzǵa jaratqan shıpasyn darytsyn deımiz...

AQB - Abaı Qunanbaı balasy,
MJK - Máshhúr-Júsip Kópeev
DKT - Dosaı Kenjetaı
ZJB – Zikirıa Jandarbek
ÁFI - Ál-Farabı
HISI - Hoja Ahmet Iassaýı

Yqylas Ojaıulynyń facebook áleýmettik jelisindegi paraqshasynan