Áleýmettik jelilerde neke agenttikteri qyzmetterin usynyp jatyr. Bul týraly newtimes.kz habarlap otyr.
Neke agenttigi qazaqstandyqtarǵa Qytaıdyń kásipkerlerimen tanystyrýdy usynady. Kompanıanyń málimetterinshe, olardyń qoly bosamaıtyndyqtan ýaqytty qur jiberýge múmkindigi joq.
Facebook paraqshasyndaǵy habarlandyrý tómendegideı jazylǵan:
«18-40 jas aralyǵyndaǵy basy bos qyzdar men áıelder! Pekınnen Astanaǵa nekege turý maqsatynda elıt klýbtyń boıdaqtar toby kele jatyr. Arnaı is-sharalar josparlanýda. Er azamattar jaqsy qamtamasyz etilgen, eýropalyq joǵary bilim alǵan, aǵylshyn tilin biledi, kóbisi orys tilin biledi. Kúıeý jigittiń saýalnamasymen neke agenttiginde tanysýǵa bolady. Klıentter úshin qatysý baǵasy -15000 teńge, klıent emesterge – 25000 teńge. Tańdaý bar. Barlyq suraqtar boıynsha: 8 702...98... habarlasyńyz» , – delingen habarlamada.
Qońyraýǵa jaǵymdy áıel daýysy jaýap beredi jáne sharttyń málimetimen tolyqqandy tanystyrady. Siz kelisimge turyp, saýalnamany toltyrýyńyz kerek eken, 5 sýretińizdi ótkizip, kúıeý jigitterdiń saýalnamasymen tanysa alasyz. Sodan keıin agenttiktiń qyzmetine aqsha tóleısiz.
«Bul jigitter kásipkerler bolyp tabylady, árkimmen kezdesýge ýaqyttary joq, tek otbasy qurǵysy keletin qyzdardy izdeıdi. Múmkin siz unatyp, sizdi unatpaı qalýy múmkin. Ondaı jaǵdaılar da bolady. Sol úshin sýretińizdi jiberesiz, saýalnama toltyrasyz, biz olarǵa jiberemiz. 10 qańtarǵa deıin biz sońǵy sýretterińizdi jiberemiz, múmkin top ózgerip, basqa bireý sizdi unatyp qalar. Keıinnen sizdi qaı jigit unatqanyn aıtamyz. Olar kelgenshe aralasyp, sóılese turasyzdar. Bizdiń keńsege kelip, Skype arqyly sóılesesizder. Odan keıin olar bizge 4 kúnge keledi, sizdi restoranǵa keshki asqa, boýlıńke, karaokege jáne basqa da oryndarǵa shaqyrady. Sońynda juptaryńyz jarasyp jatsa, gala keshki asqa shaqyrady. Eger bir-birlerińizge qyzyǵýshylyq tanytyp, romantıkalyq qarym-qatynas bastalsa, olar sizderdi bir aptadan úsh aıǵa óz eline shaqyrýǵa daıyn. Qytaıdan ǵana emes, Amerıka men Irlandıadan da kúıeý jigitter bar», – dep aıtyp berdi áıel.
