Áleýmettik qoǵamnyń narazylyǵyna ushyraǵan «Qytaı kúıeýler» máselesine ultshyldar ókili Muhtar Taıjan da óz kózqarasyn bildirdi.

«Oıbaı, bittik, tozdyq, qytaılar qyzdarymyzdy alyp ketedi, arnaıy agenttik ashyp qoıdy».
«Oıbaı, jastarymyz ne bolmaq, 91 toby sekildi buzylyp bara jatyr emes pe?»
«Oıbaı, qazaq tilimiz ólip bara jatyr, ne isteımiz?»

Dostar, óz basym qazaq qyzdarymyzǵa da, jastarymyzǵa da senem, panıkaǵa esh negiz kórip turǵan joqpyn. Jalpy, jastarymyz negizi qazaq tildi, rýhty, namysty.

1. Ózge ulttarǵa tıgen qazaq qyzdarynyń ishinde 4-aq paıyz ǵana. Al qazaq jigitterdiń ishinde bundaılar 8% quraıdy. Negizi, ınternet bar kezde ózgelerge tıem, nemese ózge ulttan alam dep júrgen qyzdar men jigitter báribir bundaı múmkindikti tabady. Biraq negizinde qyzdarymyz (96%!) qazaq jigitterdi tańdaıdy. Qazaq jigitterdiń 92% qyzdardy óz ultynan alady. Negizi, ol úshin qyzdarymyzǵa da, jigitterge de basymyzdy ıip duǵaı alǵys aıtýymyz jón! Jalpy jastarymyzdy unatamyn.

2. Biz qurttaı, kip-kishkentaı ult emespiz. Shetelde turyp jatqan qandastarymyzdy sanamasaq ta ultymyz Qudaıǵa shúkir 12 mln astam quraıdy, ol Qazaqstannyń 77%. Biz kórshilerimiz - qyrǵyzdardan, túrikmenderden, tájikterden, kúrjinderden, ázerbaıjandardan, Baltıa ulttarynan (latysh, lıtva, estonesterden), biraz Evropa ulttarynan (chehtardan, vengrlerden, bolgarlardan, shveısarlardan, avstrıalardan, t.b.) sózsiz kóppiz.

3. Aıtaıyn degenim, biz bir aýyldaǵy ult emespiz. Úlken ult bolǵan soń aramyzda józekshiler, nashaqorlar, alqashtar, qyz tekeler, satqyndar da bolýy múmkin. Adamnyń tabıǵaty sondaı, basqa ulttar da solaı ómir súrip jatyr ólmeı. Aramyzda 1-2% sondaılar bolsa da jalpy ultymyz odan tozbaıdy. Jalpy qyzdarymyz da, jastarymyz da myqty, rýhty, namysty bolyp qala beredi.

4. Jastarymyz - ultymyzdyń bolashaǵy. Jastar, ıaǵnı ultymyz, osy elde baqytty bolyp ómir súrý úshin, basqa elge qashyp ketpes úshin jumysty izdep, ózgelermen qosylmas úshin, jigitter er azamat bolý úshin, úıge, elge tirek bolý úshin, Qazaq memleketi jastarǵa myqty bilim, turaqty jumys, jyly, yńǵaıly baspanany berý kerek.

Qorytyndy, qyzdarymyz da, jalpy jastarymyz da jaman emes, jaqsy. Biraq biz olarǵa durys shart, ádiletti memleket qaldyrýǵa mindettimiz. Onda nemerelerimiz de osy elde jaqsy ómir súredi.