Qazaqstandaǵy Ulttyq Qaýipsizdik Komıtetiniń burynǵy tóraǵasy Nartaı Dútbaevtyń ustalyp, qamaýǵa alynýy, taıaýda ornynan taıdyrylǵan mınıstr Q. Bishimbaevtyń ústinen tergeýdiń júrip jatýy, kezinde «ekinshi Berıa» atalǵan Aslan Mýsınniń elshilikten birden zeınetke ketirilýi, zeınetkerler qorynyń basshysy R. Erdanaevtyń aqsha jep qamaýǵa alynýy, t.b. sheneýnikterdiń jıi paramen ustalyp jatýy, «tirkeý» týraly zańnyń aıaǵynyń kún ótken saıyn úlken aıǵaıǵa ulasa bastaýy, bireýlerdiń ashyqtan-ashyq Astana jezókshelerin baı qytaılarǵa saýdalamaq bolý áreketi, orta bilim beretin mektepterge zorlap engizilgen «úsh tildilik», t.b. qoǵamdaǵy túıtkilder qordalanyp kelip, eldi jaılaǵan ekonomıkalyq daǵdarystyń sońy úlken saıası daǵdarysqa aparyp soqpaı ma degen de kúdik joq emes.

Osy arada basyn ashyp alatyn bir nárse, halyqty ózderine ashyq qarsy qoıyp otyrǵandardyń óziniń tek bılik tarapynan bolyp otyrýy - taǵy da taǵy da amalsyz oıǵa qaldyrady. Sonda bul arandatýshy bılik ókilderi ashyqtan ashyq qazirgi prezıdent N. Nazarbaevqa ashyq qarsy shyǵyp otyrǵandaı áser etedi. Sonymen bıliktiń joǵary eshelonynda Taq talasy men Baq talasy bastalyp ketken joq pa degen kúdik qylań beredi.

Onyń ústine dál osy tusta Muhtar Ábilázovtiń Fransıa abaqtysynan bosap shyǵyp, bizdegi saıası júıege ashyqtan ashyq qarsy shyǵyp, kún saıyn ártúrli deńgeıdegi saıası aqparattar taratýy, onsyz da ishterinen ázer tynyp júrgen halyqtar arasyna, ásirese, óz otanynda ógeı balanyń kúıin keship otyrǵan osy memleketti qurýshy Qazaq ultynyń arasyna úlken bir dúrbeleń ákelmeı me degen de kúdik joq emes.

Álemdik saıası aqýaldyń kúrdelenýi, bizdiń bılikke únemi «ákelik qamqorlyq» jasap kelgen jáne shetel tarapynan ártúrli ekonomıkalyq sanksıalarǵa ushyraǵan Reseıdiń óziniń ekonomıkalyq jaǵdaıynyń kún saıyn nasharlaýy, AQSH-qa san qubylǵan Tramptyń prezıdent bolyp kelýi, ýshyǵyp turǵan Sırıa men Ýkraına jaǵdaıy da túptiń túbi Qazaqstandaǵy saıası aqýalǵa óz áserin tıgizbeı qoımaıtyn sıaqty ma, qalaı? Ult baılyǵyn urlaýmen, tonaýmen, olaryn únemi shetel asyrýmen kelgen, shetelderdegi qaptaǵan ofshorlarǵa júzdegen mıllıardtaǵan dollarlar jasyrǵan naǵyz qazaqstandyq elıtanyń da taǵdyry qyl ústinde turǵandaı áser etedi... Endi olar qıt etse, urlaǵandaryn shetel asyryp, ózderi artynan qashyp baryp, jasyryna qoıatyn ol qýlyqtarynyń da bolashaǵy senimsiz ári buldyr bolaıyn degendeı me, qalaı?

09.01.2017 jyl.