Almaty qalalyq soty «Fenıks» fılminiń rejıseri Talǵat Jánibekovti qamaý merzimin uzartty dep, habarlaıdy Today.kz tilshisi. Ustalǵan rejıserdiń advokaty Serik Aıtbaevtyń aıtýynsha, sýdıa shaǵymnan bas tartýǵa sheshim qabyldaǵan.

Qorǵaýshynyń aıtýynsha, tergeý 23 qańtarǵa deıin uzartyldy.

«Biz baǵalaý týraly eseptiń túpnusqasyn usyndyq. Kepildegi múlik aýyrtpalyǵynyń joq ekendigi týraly túzetý, kepil berýshiniń jazbasha kelisimi, aýyl ákiminiń jazbasha minezdemesi, aýyl turǵyndarynan minezdeme. Sýdıa bul qujattardyń barlyǵy isti jeńildetedi dep otyr. Olar aqyldasa kele, shaǵymnan bas tartýǵa sheshim qabyldady. Onyń sebebin bizge habarlaǵan joq. Bes jumys kúniniń ishinde qaýlynyń shyǵatyndyǵyn aıtty. Biraq, sanksıalanǵan qamaý eki aıǵa deıin kúshinde qalady. Bizge ákim minezdeme berdi. Osy ýaqytqa deıin eshqandaı kúdikti mundaı anyqtama ákelgen joq. Bul adam aýylda burynnan beri turady. Ol úsh bala tárbıelep otyr. Tórt aılyq balasy jáne kári sheshesi bar. Eger ol tergeýden qashyqysy kelse, baıaǵyda-aq kedergi keltirip, ketip qalar edi. Kúnine eki ret tergeýge baryp júrdi. Onyń qamaýǵa ne úshin alynǵanyn bilmeımin. Resmı sebebi – tergeýge kedergi keltirgen. Búgin tergeýdiń 23 qańtarǵa deıin uzartylǵany belgili boldy»,-dedi Serik Aıtbaev.

Talǵat Jánibekovtyń ustalýy

28 jeltoqsanda, ustalǵan Talǵat Jánibekov asa iri mólsherde memleket múlkin jymqyrdy degen kúdikpen aıyptalyp otyr. Tergeýdiń aqparaty boıynsha, Almaty qalasynyń Sybaılas jemqorlyqqa qarsy is-qımyl ulttyq búrosy departamentiniń qyzmetkerlerimen Talǵat Jánibekov QR QK-niń  189 babynyń 4-bóligi 2-tarmaǵy boıynsha (senip tapsyrǵan asa iri kólemdegi bóten múlikti qylmystyq toppen ıemdenip alý nemese jymqyrý) kináli dep tanylyp, qylmys ústinde ustaldy. 29 jeltoqsanda belgili bolǵandaı, Talǵat Jánibekov 28 aqpanǵa deıin qamaýǵa alyndy.

Rejıserdi aıyptaý

Esterińizge salaıyq, «Fenıks» fılmine baılanysty jaǵdaı sottyń talqylaýyna túsken bolatyn. Atap aıtqanda, Astana qalasynyń Saryarqa aýdandyq sotynda QR mádenıet jáne sport mınıstri Arystanbek Muhamedıulyny aqsha bopsalady dep kinálaǵan Talǵat Jánibekovke qatysty qylmystyq is qaralǵan. Rejıserdyń aıtýynsha, mınıstrdiń kesirinen «Fenıks» atty fantasıkalyq fılmin túsirý jumystary toqtap qalǵan.

Today.kz redaksıasyna bergen eksklúzıvti suhbatynda A. Muhamedıuly shıelenisip jatqan jaǵdaıdy onyń bedelin túsirý arqyly laýazymynan aıyrýǵa baǵyttalyp uıymdastyrylǵan kampanıamen baılanystyrdy. Mınıstrdiń pikirinshe, aıyptylar tarapynan kóterilgen baıbalam – búdjettik qarajatty urlaǵandary úshin jaýapkershilikten qutylýdyń amaly.

Mınıstrdiń advokaty Eskendir Álimbaevtiń aıtýynsha, T. Jánibekovtiń aıyptary shyndyqqa janaspaıdy. Zańger «Fenıks» fılmin qoıýshynyń mınıstrge taǵyp otyrǵan aıyp-shaǵymdary kúmándi málimetterge súıengendiginen, sotta dáleldenbeı, teriske shyǵarylyp otyrǵandyǵyn aıtty.

Buǵan deıin Reseı kınematografısteri odaǵy tóraǵasynyń orynbasary Oleg Ivanov aıyp taǵylǵan mınıstrge arasha tústi.

21 qazanda, osy kúnderi «Oskar» syılyǵynyń nomınanty bolyp júrgen belgili rejıser Ermek Tursynov ta Arystanbek Muhamedıulyna qatysty oqıǵalar boıynsha óz pikirin bildirgen. Ol «Fenıks» fılminiń tızerin saraptaı kele, onyń eskilik jolmen túsirilip, burynǵyny qaıtalaǵan stýdenttiń kýrstyq jumysy deńgeıinde jasalǵan dúnıe dep, tómen baǵa berdi. Rejıser túsirilgen tızerdiń quny bólingen qarajatqa sáıkes emestigi men Muhamedıulyna top bolyp orynsyz aıyp taǵýdy qoldamaıtynyn aıtty.  

24 qazanda Today.kz Tuńǵyshbaı Jamanqulov pen «Qazaqfılm» kınostýdıasynyń buryńǵy basshylarynyń biri Gaýhar Ysqaqovaǵa qatysty sotqa deıingi tergeýdiń júrgizile bastaǵany týraly habarlaǵan.

25 qazan kúni QR mádenıet jáne sport mınıstri Arystanbek Muhamedıulyǵa jala taǵý jónindegi is boıynsha sot Talǵat Jánibekovti aıypty dep taýyp, oǵan QR Qylmystyq kodeksiniń 130 babynyń 3 tarmaǵyna sáıkes 500 aılyq eseptik kórsetkish kóleminde aıyppul taqty. Sot sheshimi boıynsha pikir bildirgen mınıstr A. Muhamedıuly T. Jánibekovke qatysty aýyr jazanyń qoldanylmaýyna qolynan kelgen bar amaldyń qoldanǵanyn atap ótken bolatyn. 

2 qarashada, Tuńǵyshbaı Jamanqulov 60 mıllıon teńge jymqyrǵan degen kúdikpen ustalǵan bolatyn. Eki kún ótken soń, Jamanqulov óziniń qorǵaýshysynyń qatysýymen, búdjettik qarajatty urlaǵanyn moıyndap, keltirilgen zalaldy óteýge mindettendi.

5 jeltoqsanda, «Fenıks» fılmin túsirýge bólingen búdjettik qarajattyń urlanýyna baılanysty kóterilgen is boıynsha, qarjyny óteý sharalary bastaldy. Bul týraly Sybaılas jemqorlyqqa qarsy is-qımyl ulttyq búrosy Today.kz  redaksıasynyń remı saýalyna jaýap berdi.