Qazaqstan Respýblıkasynyń Ulttyq ekonomıka mınıstri qyzmetin atqaryp, eki apta buryn qyzmetten ketken Qýandyq Bıshimbaev tutqyndaldy. Bul týraly Jemqorlyqqa qarsy ulttyq búro habarlady. 

Málimdemede eks-mınıstrdiń qomaqty kólemde para alyp, jeke maqsatqa jumsaǵany úshin tutqyndalǵany aıtylǵan.

Bıshimbaev QR QPK 128-babyna sáıkes, Astana qalalyq İİD ýaqytsha ustaý oqshaýlaǵyshyna qamaldy.

Ol, 28 jeltoqsan kúni qyzmetten bosatyldy. Ol bul qyzmette 8 aı ǵana bolǵan. Qýandyq Bıshimbaev ulttyq ekonomıka mınıstri qyzmetine deıin "Báıterek" holdıńin basqarǵan.

17 qarashada "Báıterek DEVELOPMENT" AQ basshylary ustalǵan bolatyn. Sybaılas jemqorlyqqa qarsy is-qımyl ulttyq búrosy "Báıterek DEVELOPMENT" AQ basshysynyń para alý deregine qatysty sotqa deıingi tergeý jumystaryn júrgizgen edi. Tergeý barysynda "Báıterek DEVELOPMENT" AQ laýazymdy Jaqypov A. (Basqarma tóraǵasynyń orynbasary), Aıtymbetov B. (memlekettik-jekemenshik seriktestik dıreksıasy departamentiniń basshysy) jáne Sarıev Ǵ. (basqarýshy dırektor) esimdi laýazymdy tulǵalar júıeli túrde "Nurly jol" memlekettik baǵdarlamasy aıasynda jaldamaly turǵyn úı keshenin satý qyzmetterin kórsetetin qurylys kompanıalarynan iri kólemde para alǵany anyqtaldy.

Aıta keter bolsaq, 30 jeltoqsan kúni prezıdent Nazarbaev burynǵy ekonomıka mınıstri Qýandyq Bıshimbaevqa qatysty tergeý sharalary júrgizilip jatqanyn aıtqan edi. 

Eske salsaq, 1980 jyldyń týmasy, jas kadrlar ókili bolǵan Bıshimbaev «Bolashaq» baǵdarlamasy boıynsha Dj. Vashıngton Ýnıversıtetin bitirgen.