Búgin Aqordada Elbasynyń qatysýymen úkimettiń keńeıtilgen otyrysy ótti. Bılik palatalarynyń tolyq quramdy kezdesýinde mańyzdy sheshimdermen qatar bir qatar aýys-túıister bolyp jatyr.
Úkimet músheleri aldynda sóz sóılegen Prezıdent Nazarbaev eń áýeli syrttaǵy qandastarymyzdy elge shaqyrǵan 22 jyl burynǵy sózin taǵy bir jańǵyrtty. Bul týraly Elbasy sózi birden aqparat keńistigin kezip ketti. «Biz oralmandardyń jaǵdaıyn jasaýymyz kerek. Al ishki kóshi-qon máselesi týraly buryn da aıtylǵan. Adamdardy jumys oryndary bar jerlerge qaraı jiberý qajet. Ońtústik óńirlerde jumys oryndary az, sondyqtan adamdar bul jaǵdaıdy durys túsinýleri tıis. Qudaıǵa shúkir, Qazaqstan keń-baıtaq. Jumys oryndary ashylýda, ásirese jastar bir jerde otyra bermeı, ár jerge baryp, jumys istep, elimizdiń bolashaǵyn birge jasaýy kerek», – dedi N. Nazarbaev. Otyrys barysynda sóz sóılegen Dúısenova hanymnyń aıtýy oıynsha bıylǵy jyly elge qandastarymyzdan 13 myń otbasy oralyp, Qazaqstan halyq sanyn 35 myń adamǵa ulǵaıtqan. Aldaǵy qyrkúıek aıynda oralmandarǵa qatysty jańa zań qabyldanatyn bolady.
Úkimet otyrysy barysynda úkimette jańartýlar bolatyny aıtyldy. Elbasynyń sózine saı endi Úkimet 12 mınıstrlik pen otyzǵa tarta komıtetten turatyn bolady. Búginde 17 mınıstrlik, 9 agenttik, 54 komıtet, 272 departament bar. Iaǵnı 12 mınıstrlik, 30 komıtet qalady, al barlyq 9 agenttik joıylyp, komıtet túrinde mınıstrlik qaramaǵyna kiredi. Bul týraly Prezıdent: «Úkimetpen Parlamentpen aqyldasa kele, mynadaı sheshim qabyldadym: jańa bes mınıstrlik qurylady. Onyń ishinde ulttyq ekonomıka mınıstrligi qurylmaq. Oǵan búgingi ekonomıka mınıstrliginiń ókilettigi, búdjettik josparlaý men óńirlik damý qyzmetteri beriledi. Statısıka jónindegi agenttik pen tabıǵı monopolıalardy retteý agenttikteri, tutynýshylar quqyǵyn qorǵaý, básekelestikti damytý agenttikteri de osyǵan kiredi. Premer-Mınıstrdiń usynýymen bul laýazymǵa Erbolat Dosaevty taǵaıyndaımyn»- dep málimdegen. Memleket basshysynyń atap ótýinshe, Indýstrıa jáne jańa tehnologıalar kólik jáne komýnıkasıa mınıstrlikteriniń, baılanys jáne aqparat, ulttyq ǵarysh agenttikterimen ókilettilikteri berile otyryp, ınvestısıa jáne damý jónindegi mınıstrlik quryldy. Atalǵan vedomstvoǵa Áset Isekeshev basshylyq jasaıtyn bolady. Elbasy buǵan deıin kólik jáne komýnıkasıa mınıstri bolǵan Jeńis Qasymbek atalǵan mınıstrliktiń birinshi orynbasary qyzmetine taǵaıyndalǵanyn atap ótti. Al buǵan deıin Baılanys jáne aqparat agenttiginiń basshysy bolǵan Asqar Jumaǵalıev Áset Isekeshevtiń orynbasary qyzmetine kirisedi. Sonymen qatar Energetıka mınıstrligi qurylyp, oǵan Vladımır Shkolnık basshylyq jasaıtyn boldy. Buǵan deıin Munaı jáne gaz mınıstri bolǵan Uzaqbaı Qarabalın jańa mınıstrdiń birinshi orynbasary bolyp taǵaıyndaldy.
Sondaı-aq Tótenshe jaǵdaılar mınıstrliginiń ókilettiligi İİM-ne beriledi. Mınıstrlikti Q. Qasymov basqarady, al onyń orynbasary V. Bojko bolady. Memlekettik qyzmet isteri jáne jemqorlyqqa qarsy is-qımyl agenttigin Q. Qojamjarov basqarady. Vedomstvonyń málimetinshe, Qarjy polısıasy ókilettiligi Memlekettik qyzmet isteri jáne jemqorlyqqa qarsy is-qımyl agenttigine beriledi. Al ekonomıkalyq jáne qarjylyq quqyqbuzýshylyq máseleleri Qarjy mınıstrligine beriledi. Mádenıet jáne sport mınıstrligin A. Muhamedıuly basqarady. Sonymen qatar, N. Nazarbaev óńirlik damý mınıstri bolǵan Bolat Jámishevtiń Qazaqstannyń Damý Bankine taǵaıyndalatynyn atap ótti.
Aqorda baspasóz qyzmetiniń habarlaýynsha bundaı ózgerister qajettilikten týyp otyr. Elbasynyń tapsyrmasy boıynsha jańa qyzmetine bir toqsan tolǵan premer-mınıstr Másimov eldiń tutas aýmaǵyn aralap shyqqan. Ol túrli ákimdermen kezdesip, jańa baǵdarlamalar jasaý qajettigin túsingen. Bunyń bári almaǵaıyp zamanda ulttyq qaýipsizdikti saqtaý men ekonomıkany órkendetýdiń sharalary bolyp tabylady. Atalmysh jıynda Prezıdent turaqtylyq pen beıbitshiliktiń mańyzdylyǵyn basa aıtyp: «Birliksiz jurttyń jaǵdaıyn biz basqalardan kórip otyrmyz. Turaqtylyqtyń máni men mańyzyn Ýkraınanyń qazirgi ahýalynan baıqaýǵa ábden bolady», - dedi. Úkimettiń jańa quramyna sáttilik tilegen Elbasy «el ishinen jaý izdep, birin-biri kemsitý eshqashan da eshbir memleketti jaqsylyqqa aparmaıtynyn» da eskerte ketti.
Nurǵalı Nurtaı
“Qamshy” silteıdi
