5 mıllard teńgeni bıznesmendermen bólisip aldy dep isti bolǵan Rýslan Erdenaevtyń ornyna Biryńǵaı zeınetaqy jınaqtaý qoryna jańa basshy keldi, dep habarlaıdy Ktk arnasy.
Mıllıondaǵan qazaqstandyqtyń zeınetke jınaǵan qarjysyna jaýapty mekemege Nurbıbi Naýryzbaeva taǵaıyndalyp otyr. Jańa tóraıym kezinde «Turǵynúı qurylys jınaq bankin» 10 jyldaı basqarǵan. Tek, búgin Ulttyq bank basshylary jer kókke syıǵyzbaı maqtaǵan Naýryzbaeva hanym, 4 jyl buryn qaramaǵyndaǵylary memlekettik páterlerdi ózara bólisip alǵany dáleldengen soń , qyzmetinen alynǵanyn aıta keteıik.
5 mıllard teńgeni jedi dep aıyptalǵan Rýslan Erdenaevtyń ornyn búginnen bastap Nurbıbi Naýryzbaeva basty. Buǵan deıin ol osy orynda ýaqytsha otyrǵanyn aıta keteıik. Al búgin Naýryzbaevany resmı túrde kópshilikke tanystyrǵan Ulttyq bank basshylary jańa tóraıymdy jerge túsirmeı maqtady. Núrbıbi Serikqajy qyzy da belsheden bylyqqa batqan Biryńǵaı zeınetaqy qorynyń jumysyn aldaǵy ýaqytta jónge salamyn dep birinshi málimdemesin jasady.
Nurbıbi Naýryzbaeva, Biryńǵaı zeınetaqy jınaqtaý qorynyń tóraıymy:
-Aldaǵy ýaqytta zeınetaqy qorynda ishki tártip kúsheıtiletin bolady. Halyqaralyq standarttarǵa saı qyzmet jasaımyz. Salymshylardyń quqyǵyn qorǵap, olardyń jıyp-tergenin saqtaý meniń birinshi mindetim bolmaq.
Biraq «qordyń qyzmetin qatyram» degen bul basshy da aldyńǵy qyzmetinen yń-shyńsyz ketpegenin eske salaıyq. Nurbıbi Naýryzbaeva «Turǵynúı qurylys jınaq bankin» basqaryp turǵanda qaramaǵyndaǵy qyzmetkerleri páterlerdi ózara bólisip alyp, daýǵa qalǵan bolatyn. Memlekettik baǵdarlama boıynsha, elıtalyq aýdanda turǵyzylǵan «Áıgerim» kesheninen olar qos-qostan páter alǵan. Bankırlerdiń bylyǵy Aqordaǵa deıin jetip, sodan beri «Turǵyn úı qurylys jınaq bankiniń» basshylaryna memlekettik baǵdarlama boıynsha úı alýǵa tyıym salynǵan edi. Sóıtip, Naýryzbaev hanym da ózi ornyna kelgen áriptesi sekildi qyzmetinen alynǵan.
Nurlan Jazylbekov, Májilis depýtaty: 17 qazan, 2013
- Máselen, Almatyda Ál-Farabı men Rozybakıev kósheleriniń qıylysyndaǵy «Áıgerim» turǵyn úı keshenin bank qyzmetkerleri ózara bólisip alǵan. Tizimde kósh bastap tóraıym Nurbıbi Naýryzbaeva men onyń eki orynbasary tur. Olardyń bireýi de kezekke turý syndy resmı talaptardy pysqyrmaǵan. Sondyqtan Úkimet pen Bas prokýrtýra «Turǵynúı qurylys jınaq bankiniń» basshylaryna qatysty tekserý júrgizsin.
Biraq, Ulttyq bank basshylyǵy endi ondaı keleńsiz jaıttyń qaıtalanbaıtynyna senimdi bolsa kerek. Dese de, budan bylaı Biryńǵaı zeınetaqy qory jeke qarjysyn da basqara almaıdy eken. Ondaǵy barlyq aktıvterdi endi Ulttyq bank baqylaýyna almaq. Iaǵnı, saýda sattyqty bas banktiń ózi júrgizedi.
