Qazaqstandyq telejúrgizýshi Sandýǵash Sultan túngi ekide polısıa formasyn kıgen eki er adamnyń ýaqytsha tirkeýdi surap kelgenin málimdedi dep habarlaıdy tengrinews.kz. Telejúrgizýshi Astanada kópqabatty úıde turady.

Ol telefon arqyly tilshimizge oqıǵanyń mán-jaıyn baıandady. "Men otbasymmen úıde bolǵanmyn, balalarymmen uıyqtap jatqanmyn. Túngi 2.24-te bireýler kiltpen esikti qaqty. Kórshiler shyǵar dep oıladym, esikke jaqyndasam, eki polıseı tur, turǵylyqty jerim týraly surady. Polısıa formasyn kıgen. Árıne, esikti ashpaı qoıdym", - dedi Sandýǵash Sultan esik aldynda konserjdiń otyratynyn aıtyp. Ol polıseılerdiń suraq qoımaı, ketip qalǵanyna tańǵalyp otyr.

Aıtýynsha, bul úıde jalǵa beriletin páter joq. Júrgizýshi eshkimniń de shýlady dep shaǵym túsirýi múmkin emes ekenin aıtady, sebebi olardy tanıdy eken. "Biz shýlamaımyz, eshkim shaǵymdanbaǵan. Túnde kelgenderine tańǵaldym, olarǵa esik ashpaı qoıdym", - dedi ol.

Telejúrgizýshi  baqylaý kamerasyna túsirilgen vıdeony joldady. Kadrlarda kelgenderdiń túri kórinedi. "Astanada ýaqytsha tirkeýge qatysty eshqandaı da tekseris joq. Ýchaskelik polıseıler kórshiler 23.00-den keıin shýlaǵandardyń ústinen shaǵym túskende ǵana bara alady. Polısıa túnde sebepsiz barmaıdy. Josparly tekseris nemese reıd júrgizilip jatqan joq", - dep habarlady Astana qalalyq İİD baspasóz qyzmetiniń jetekshisi Sofá Qylyshbekova.

Departamenttegilerdiń aıtýynsha, olar Sandýǵash Sultanǵa habarlasyp, oqıǵanyń mán-jaıyn anyqtaýǵa ýáde beripti.