Ystambul polısıasy Jańa jyl túni Reina túngi klýbynyń qonaqtaryn atyp tastady delingen kúdiktini ustady, - dep habarlaıdy tengrinews.kz Daily Sabah saıtyna silteme jasap.

Basylymnyń málimetinshe, Ózbekstan týmasy Abdýlgadır Masharıpov arnaıy operasıa kezinde Ystambuldyń Esenúrt aýdanynda ustalǵan. Ol osyǵan deıin tanysynyń páterinde jasyrynyp kelipti. Tanysy Qyrǵyzstan týmasy eken. Gazet Masharıpovtyń ustalǵan kezde túsirilgen sýretin jarıalady, sýretten onyń jaralanǵanyn kórýge bolady. «Ábý Muhammed ál-Horasanı» degen laqap atty jamylǵan Abdýlgadır Masharıpovty quryqtaý kezinde onyń 4,5 jastaǵy uly da qasynda bolǵan.

Eske salaıyq, Ystambulda 1 qańtarǵa qaraǵan túni Reina túngi klýbyna shabýyl jasalǵan bolatyn. Kúdikti mekemege kirip kelip, adamdardy ata bastaǵan. Saldarynan 39 adam qaza tapty. Terakt jasady delingen kúdikti jasyrynyp úlgergen.

Túrik polısıasy Masharıpovty izdestirý barysynda Ystambulda 150 myń dollar qarajat tapqan. Bul qarajat, tergeýdiń málimetinshe, terakt jasaǵany úshin tólem bolýy múmkin.