Qazaqstanda azamattardyń sottylyǵy bar nemese joqtyǵy týraly anyqtama berý tártibine ózgerister engizildi, dep habarlaıdy ATPress.kz
Bul týraly Óńirlik komýnıkasıalar qyzmetinde ótken brıfıń barysynda Qazaqstan Respýblıkasy Bas prokýratýrasynyń Atyraý oblysy boıynsha basqarma basshysynyń orynbasary Jánibek Semǵalıev habarlady.
- Ótken jyldyń 15 jeltoqsanynda №816 Úkimet qaýlysymen kórsetiletin memlekettik qyzmet tiziliminde birqatar ózgerister boldy. Qazaqstan Respýblıkasy Bas prokýratýrasynyń quqyqtyq statısıka jáne arnaıy esepke alý jónindegi komıtettiń «Tulǵanyń qylmystyq quqyq buzýshylyq jasaýy týraly málimetterdiń bolýy ne bolmaýy týraly anyqtama berý» memlekettik qyzmeti «Sottylyqtyń bolýy ne bolmaýy týraly anyqtama berýge» aýystyryldy, - dedi basqarma basshysynyń orynbasary Jánibek Semǵalıev.
Iaǵnı, endi jańa ózgeriske sáıkes buryn sottylyǵy bolǵan azamattan jazasyn ótep kelgennen keıin onyń sottalǵandyǵy týraly málimet alynyp tastalady. Qylmys jasaǵandyǵy týraly málimetti joıý úshin azamat tıisti jazasyn ótep kelgen soń jeke kýáligimen halyqqa qyzmet kórsetý ortalyǵyna barýy tıis. Sol jerde ol ótinishin toltyryp, 3 mınýt ishinde sottylyǵy joq týraly anyqtama qujat ala alady.
- Keıbir mekemeler azamattardy jumysqa qabyldaý kezinde olardan sottalmaǵandyǵy týraly anyqtama ákelýdi talap etedi. Bul buryn sottylyǵy bolǵan azamattardyń narazylyǵyn týdyryp kelgen edi. Azamattardyń quqyn qorǵaý maqsatynda osy másele Bas prokýratýrada qaraldy. «Memlekettik qyzmetter týraly» QR Zańynyń 13 babyna sáıkes, standart kórsetiletin memlekettik qyzmet tizimdemesine qyzmetti engizgen kúnnen bastap úsh aıdyń ishinde bekitiledi, - deıdi J.Semǵalıev.
Osylaısha, 2017 jyldyń 2 toqsanynan bastap buryn qylmystyq jaýapkershilikke tartylǵan, sottylyqtary joıylǵan nemese alynyp tastalǵan azamattar anyqtamany «Sottylyǵy joq» degen belgimen ala alatyn boldy.
