Qazaqstandyq Alına Mustafınanyń Jıronda túsirgen vıdeosyn reseılik telejúrgizýshi Ivan Ýrganttyń «V poıskah Don Kıhota» baǵdarlamasynda paıdalanǵan. Bul týraly jýrnalıs Alına Mustafına óziniń Facebook paraqshasyna jarıalady.
«23 mınýt 15 sekýndtan bastap Ivan Ýrgant pen Poznerdiń baǵdarlamasynda meniń (20 sekýnd) vıdeomdy kórsetti. Men ony Jıron qalasynda túsirgen edim. Kezdeısoq ony birinshi arnanyń saıtynda kórip qaldym. Muny maqtan tutý kerek pe, álde zańgerge tóleıtin qarjyny jınaı bereıin be? Nelikten mennen ruqsat suramady nemese tıtrǵa qospaǵan?» dep óz narazylyǵyn bildirdi.
Reseılik birinshi arnanyń baspasóz qyzmetiniń taratqan habarlamasynda baǵdarlama rejıseri Valerıı Spırın Alına Mustafınanyń materıalyn paıdalanǵanyn moıyndap, odan keshirim suraǵany aıtylady.
Ivan Ýrganttyń "V poıskah Don Kıhota" baǵdarlamasynyń avtorlary qazaqstandyq Alına Mustafınanyń vıdeosyn qoldanǵandary úshin qalamaqy tóleıtin boldy.
