«Slaván bazary» baıqaýynyń jeńimpazy Dımash Qudaıbergenov Qytaı elindegi tanymal ánshiler baq synaıtyn «I am Singer» (Men ánshimin) atty án baıqaýyna qatysýǵa ketken bolatyn. Onda álem moıyndaǵan ánshiler óner kórsetedi. Dımash óziniń ınstagram paraqshasyna «Olarmen baq synasyp, qazaq atyn shyǵarý men úshin zor mártebe» dep jazdy.

Qazir baıqaýdyń alǵashqy nátıjeleri shyǵyp, qazaqstandyq ánshi alǵashqy synnan súrinbeı ótti. Alda talaı asýlar kútip tur. Aspan asty elinde óner dodasyna túsip jatqan Dımash Qudaıbergenovti jergilikti telearna qonaq etken.

«Qytaı telearnasynyń eń bedeldi keshkilik "Kýaı Ly Da bin ıen" ázil shoýyna qonaqta boldym. Onda Bıbıgúl Tólegenova apamyzdyń "Bulbul"-yn  shyrqadym. Sonymen qatar,  Selın Dıonnyń «All by myself» pen  qytaıdyń "Jańa kún" ánin aıtyp berdim. Qytaıdyń eń tanymal júrgizýshilerine qazaq tilin úırettim. Bir ázildesip, bir kúlip, bir marqaıyp qaıttyq. Bul baǵdarlamaǵa buǵan deıin Devıd Bekxam, Bý I Pon, Shıen Battıe syndy t.b álemdik juldyzdar da qonaqta bolǵan eken» deıdi Dımash Qudaıbergenov.