Almaty oblysynda ishi aýyryp, aýrýhanaǵa túsip, artynsha qaıtys bolǵan balanyń ata-anasy ádildik izdeıdi. Balasynan aıyrylǵan jandar jaýapty mamandar ádil jazadan qutylyp ketedi me dep úreılenedi. Sebebi, dárigerlerdiń ózi olardan balanyń ólimi jaıly shý shyǵarmaýdy ótinip, ózara keliseıik dep te usynys jasaǵan. Bul týraly QazAqparat.

Oqıǵa Kóksý aýdanyndaǵy aýrýhanada bolǵan. 12 qańtar kúni balanyń anasy Gúlzıra Sháken ulymen aýrýhanaǵa túsedi. Anasynyń sózinshe, úsh kúndik emnen keıin balanyń beti beri qarap, jaǵdaıy jaqsarǵan. Tipti tórtinshi kúni úılerine qaıtamyz degen de úmit bolǵan. Alaıda, bir jarym jastaǵy Aqjoldyń kúre tamyryna salynǵan sıstemadan keıin bala qaıtys boldy, deıdi ata-anasy.

«Bastapqyda balanyń moıynynyń oń jaǵyndaǵy kúre tamyrǵa sıstema saldy. Qan úıip qalǵan ba, bilmeımin. Dári júrmedi. Sodan keıin sol jaq kúre tamyryna sıstema salyp, maǵan qarap otyryńyz dep ketip qaldy. Qarasam balanyń moınynan qan aǵyp jatyr. Júgirip, dárigerlerdi izdedim. Shamamen tańerteńgi saǵat ondar shamasy. As bólmege barsam bári sháı iship otyr eken. Moınynan qan ketip jatyr dep edim, barlyǵy júgirip keldi. Biraq qandy toqtata almady. Bala qansyrap óldi», - deıdi balanyń anasy Gúlzıra Sháken.

Ata-ananyń oıyndaǵy bar kúdik dárigerler balanyń kúre tamyryn jaryp jibergen dep sanaıdy.   

«Meniń balam mal emes, kúre tamyrǵa ıne tyǵatyndaı. Eger balanyń jaǵdaıy aýyr bolsa, nege dárigerdi oblystan shaqyrtpady. Bizge oblystan dárigerler keledi dedi. Biraq kelmedi. Bizdi aldady» deıdi, uldyń ákesi Ákpár Nurjuma.  

Dárigerler balanyń jaǵdaıy aýyr bolǵanyn aıtyp otyr. Biraq balanyń ókpesine sýyq tıgen degen pikirmen ata-anasy múldem kelispeıdi. Mamandar, jalǵan aqparat berip jatyr dep narazy. Tipti Aqjoldyń aýyrǵandaǵy qujattaryn ózgertip, ózderine yńǵaıly etip jatyr degen senimde. Al kóz jumǵan Aqjoldy emdegen dáriger-anestezıolog Vladımır Kım balanyń ómirin saqtap qalýǵa tyrystyq deıdi.

1,5 jastaǵy uldarynyń ólimi ata-ananyń júregin qan jylatty. Olar Aqjoldyń dúnıege kelgenin 10 jyl boıy kútken. Endi olar jaýapty dárigerler jaýapkershilikten qutylyp ketedi me dep qorqady. Sotqa júgingeli otyrǵan ata-ana Kóksý aýdandyq aýrýhanasynyń dárigerleri ádil jazasyn alsa dep tileıdi.