Úkimettiń búgingi xalyq ártisi Asanáli Áshimov Qarjy mınıstrliginiń kınony túsirýge bólinetin aqshany kesip tastaıyny úshin Premer-mınıstr Baqytjan Saǵyntaevqa aryzdandy, dep xabarlaıdy QazAqparat tilshisi.

«Baqytjan Ábdiruly, kóp jaǵdaılar sizderge baılanysty bolady. Kóp nárse jetispeı jatady. Jobalaý bóliminde smeta bekitiledi. Sonyń jartysyn avtomatty túrde qyrqyp tastaıdy mynaý mınfınnen (qarjy mınıstrliginen - avt.). Sosyn jartysyn ózderiń tabyńdar, deıdi. Qaıdan tabamyz? Qazir jóndi demeýshiler de joq. Alǵashqy kezde bolýshy edi. Qazir joq. Sonyń saldarynan fılmder túsirilmeı, jyldap turyp qalady. Mysaly, «Almas qylysh» ta turyp baryp, turyp baryp túsirildi. Baıaǵyda «Qyz Jibek» túsirilgende qarjy Máskeýden keledi. Sol kezde Máskeýdiń aqshasyn jedik, Qazaqstannyń aqshasyn jedik. Bitpeı jatyr fılm. Sodan eń sońynda kastıngtiń aqshasyn jep, osyǵan bitirmeseńder, endi jabamyz degende, áıteýir ıtshilep bitirgenbiz. Biraq máńgilikke qalǵan óner týyndysy boldy. Al óner - xalyqtiki. Óner xalyq úshin jasalady», - dedi Áshimov.

Osy oraıda ol ártisterdi raýshan gúlimen teńedi, ony ýaqytynda sýarmasa, solyp qalady.

«Sondyqtan búgingi jınalys tarıxı jınalys dep sanaımyz. Sizdermen jıi kezdesip turǵan paıdaly, áńgimelesip, shúıirkelesip degendeı. Men ózim kúndelik jazyp júrgen adammyn. Búgingi kún sol kúndeligime altyn árippen jazylatyn kún dep esepteımin», - dep atap kórsetti xalyq ártisi.

Aıta keteıik, otyrys barysynda Mádenıet jáne sport mınıstri Arystanbek Muxamedıuly otandyq kınoındýstrıany damytý máseleleri boıynsha baıandama jasady.

Al Úkimet basshysy Baqytjan Saǵyntaevtyń oıynsha, otandyq kınoındýstrıa salasyna bıznesti kóptep tartyp, monoqalalar men shaǵyn qalalarda kınoteatrlardy kóptep ashý qajet. Otyrys barysynda Asanáli Áshimov fransýzdardyń «Qyz Jibek» fılmi arqyly qazaqtardy qalaı moıyndaǵany jaıynda aıtyp berdi.