«Tursyn Alagózov baıandy baqytyn tapty» atty maqala jarıalanǵannan keıin redaksıamyzǵa ózin Tańsholpan Ahmetova dep tanystyrǵan zeınettegi ustaz habarlasty. Ol qazaq qyzdaryn Baıan Esentaevadan úlgi almaýǵa shaqyryp, BAQ nasıhattaýdy doǵarýdy usynyp, barsha qazaq qyzdaryn ómirdi kórgen ana, áıel, ustaz retinde óz aqyl, keńesin aıtty. Sonymen qatar Baıannyń burynǵy kúıeýi Baqytbek Esentaevtyń túrmeden bosap shyǵýyna úles qosýǵa shaqyrdy.

«Men tórt balanyń anasymyn. Uldy uıaǵa, qyzdy qıaǵa qondyrdym. Zeınettegi ustazbyn. 60-qa kelsem de áleýmettik jelilerde otyryp, ǵalamtordan jańalyqtarmen tanysyp otyramyn. Sońǵy kezderi BAQ belgili prodúser Baıan Esentaevanyń jeke ómirine qatysty aqparattar jıi shyǵatyn boldy. Halyq ony qyzý talqylap jatqannan keıin, men de óz pikirimdi bildirýge bel býdym» dep sózin bastady Tańsholpan Ahmetova.

Qazaqstanda Baıan Esentaevanyń dáýiri júrip turǵanyn jáne qazaqstandyq qyz, kelinshekter odan úlgi alatynyna ishteı nalyıtynyn jetkizdi.

«Qandaı adam óz azamatyn temir torǵa qatań túzetý mekemesine 9 jylǵa toǵytyp, ózgeniń de otbasyn buzyp, basqa erkekpen júredi?! Bul qazaq halqynyń mádenıetine, tárbıesine jat. Qazaq halqy atam zamannan er azamatyn qurmettegen halyq. Bizde áıel zaty erkekterden bir saty tómen turý kerek degen túsinik bar. Sondyqtan otbasyn buzbaýǵa árekettený kerek» dep óz aqylyn aıtty.

Buǵan deıin Baıan Esentaeva BAQ birine suhbat berdi. Onda Baqytbek Esentaevtyń jaqsy jar, keremet áke bolǵanyn aıtqan edi. 60 jastaǵy Tańsholpan apaı Esentaevanyń kúıeýi 9 jylǵa qamalmaýy kerek edi degen pikirde.

«Baıan Esentaeva jýrnalıserge bergen suhbatynda kúıeýiniń barlyq jaǵdaıdy jasap otyrǵany, buǵan deıin Baıan tek óz isimen ǵana aralasyp, úı qyzmetshilerine jalaqysyn berý, mekteptiń aqshasyn tóleý t.b istermen múlde bas qatyrmaǵanyn aıtady. Iaǵnı onyń jaqsy jar bolǵanyn kórýge bolady. Sondyqtan máseleniń anyq-qanyǵyn anyqtap, kúıeýiniń jazasyn jeńildetý kerek dep esepteımin» deıdi Tańsholpan apaı.

Sonymen qatar 4 balanyń anasy Baıan Esentaevanyń kúıeýine qatysty iste tek bir jaqty ǵana pikir aıtyldy degen oıda ekenin de jetkizdi.

«2016 jyldyń jaz aıynda Baıan Esentaevanyń basynan ótkergen aýyr jaǵdaıynan keıin suhbat berdi. Barlyq BAQ bolǵan oqıǵany tek Baıannyń aıtýymen ǵana jarıalady. Al Baqytbektiń pikirin bilgen eshkim bolmady. Baıan Esentaeva ózine yńǵaıly jáne ózin utymdy kórsetetin tustaryn ǵana aıtatyny anyq».

60 jasar zeınettegi ustaz, 4 balanyń anasy, nemere súıip otyrǵan aq shashty áje jáne qazaq áıeli retinde Baıan Esentaevany nasıhattamaýǵa jáne odan úlgi almaýǵa  shaqyrdy.