Mańǵystaý oblysyndaǵy Qalamqas kenishinde Qazaqstan táýelsiz kásipodaqtar konfederasıasynyń (QTKK) jabylýyna narazy Oil Construction Company (OCC) kompanıasynyń jumysshylary kásipodaqty qaıta tirketý úshin qańtardyń besinde ashtyq jarıalaǵanyn málimdegen edi. OSS kompanıasy «Mańǵystaýmunaıgaz» kompanıasynyń Qalamqas, Jetibaı kenishterine qyzmet kórsetedi. Onyń 400-den astam munaıshysy táýelsiz kásipodaqtar konfederasıasynyń jabylýyna narazylyq bildirip ashtyq jarıalap jatyr.
Ońtústik Qazaqstan oblystyq ekonomıkalyq soty 4 qańtarda ádilet mınıstrliginiń shaǵymy boıynsha keńsesi Shymkentte ornalasqan QTKK-ny jabý týraly sheshim shyǵarǵan.
Táýelsiz kásipodaqtar konfederasıasy tóraıymy Larısa Harkova «Men Táýelsiz kásipodaqtar konfederasıasynyń jetekshisi retinde bizdiń uıymnyń jumysyn toqtatý jónindegi sot sheshimin zańdy dep moıyndaımyn. Táýelsiz kásipodaqtar konfederasıasy 2016 jyldyń aqpan aıynda tirkelgen. «Kásipodaqtar odaǵy týraly» QR Zańynyń 10 baby, 2 tarmaǵyna sáıkes, alty aıdyń ishinde, ıaǵnı 2016 jyldyń tamyzyna deıin biz Qazaqstannyń 9 óńirinde bólimsheler ashýǵa tıis edik. Alaıda, biz qajetti jaqtastarymyzdy jınaı almadyq. Soǵan qaramastan, Ádilet mınıstrligi bizge 2016 jyldyń sońyna deıin qosymsha ýaqyt berdi. Biz ony oryndaı almadyq. Sondyqtan, Ádilet organy bizdiń uıymnyń jumysyn toqtatý jóninde sotqa talap aryz berdi. Bul biz úshin zańdy» dep málimdegen edi.
QTKK 2003 jyly «Mańǵystaýmunaıgaz» kompanıasyna qarasty úsh kásiporynnyń negizinde qurylǵan. Kásipodaq uıymnyń dereginshe, onyń quramynda 2100 múshesi bolǵan.
Azattyq jazǵandaı, Aqtaýdaǵy OCC kompanıasynyń kásipodaqtar keńsesinde ashtyq ustap jatqan jumysshylar qataryn Qalamqas pen Jetibaı kenishterinen, vahtalyq aýysymnan kelgen munaıshylar tolyqtyrdy. Olar «Nur Otan» partıasyn talaptaryna qulaq asýǵa shaqyrady. Al partıanyń oblystaǵy bólimshesi ondaı aryz túspegenin aıtady.
Mańǵystaý oblysyndaǵy Oil Construction Company kompanıasynyń júzdegen munaıshysy respýblıkalyq táýelsiz kásipodaqtar konfederasıasyn tirkeýdi surap, ashtyq jarıalaǵandaryna eki aptaǵa taıady. Olardyń qataryn qańtardyń 17-sinen beri kompanıa qyzmet kórsetetin Qalamqas jáne Jetibaı kenishterinen kelgen júzdegen munaıshy tolyqtyryp, alǵashqyda 90-nan astam bolǵan narazy jumysshynyń sany qazir 400-ge taqady.
Ashtyq jarıalaǵan OSS munaıshylary ózderiniń «Nur Otan» partıasynyń músheleri ekenin aıtyp, partıanyń oblystaǵy fılıalyna renishterin bildirdi.
Mańǵystaý oblysy prokýrory orynbasary Erjan Berdibekov Azattyqqa bul máselege baılanysty komentarı bermedi. Ol uıymdastyrý bóliminiń prokýrory Aıbek Munatov arqyly resmı hat joldaýdy surady. Mańǵystaý oblysy ákiminiń minetin ýaqytsha atqarýshy Súıindik Aldashev ta «jınalystan qoly bosamaǵandyqtan» komentarı bergen joq.
Eske sala ketetin bolsaq, 6 jyl buryn Jańaózen qalasyndaǵy munaıshylardyń eńbek daýyna bılik qulaq aspaı, saldarynan jeti aı boıy ereýil jasaǵan munaıshylar men kúshtik qurylymdar arasyndaǵy qaqtyǵystan 16 beıbit turǵyn qaza tapqan edi.
