Astanadaǵy advokattar alqasynyń advokaty Jomart Sarmanov QR Prezıdentiniń Ákimshiligi Basshysynyń burynǵy orynbasary Baǵlan Maılybaevtyń qamaýǵa alynǵanyna qatysty keıbir málimetterdi aıtty, dep habarlaıdy tengrinews.kz
Sóıtsek, advokat Maılybaevty qorǵaýǵa kelisim jasapty. Jomart Sarmanov QR Prezıdentiniń Ákimshiligi Basshysynyń eks-orynbasaryna qatysty qylmystyq istiń qupıa túrde ótetinin málimdedi.
"QR UQK baspasóz qyzmetiniń BAQ-qa taratqan resmı habarlamasynyń aıasyndaǵy keıbir málimetterdi ǵana aıta alamyn. Iá, shyn máninde QR Prezıdentiniń Ákimshiligi Basshysynyń burynǵy orynbasary B.A.Maılybaev QR UQK Tergeý departamentiniń QR Qylmystyq kodeksiniń 185-babynyń 3-bóligi ("Memlekettik qupıalardy zańsyz jınaý, taratý, jarıa etý") boıynsha tergep jatqan qylmystyq iste kúdikti", - dedi Baǵlan Maılybaevtyń advokaty Jomart Sarmanov.
Ol óz qorǵaýyndaǵy azamatqa qatysty eki aıǵa qamaýǵa alý túrindegi bultartpaý sharasynyń tańdalǵanyn eske saldy.
"Keıbir jýrnalıserge jáne ózge de tulǵalarǵa, onyń ishinde Maılybaevtyń ustalǵany jáne qamalǵany týraly pikir bildirip, jasamaǵan áreketin jasady dep, basqa istermen, naqtyraq aıtsaq, eks-mınıstr Qýandyq Bıshimbaevtyń isimen belgili bir baılanys taýyp otyrǵan belgili saıasattanýshylarǵa eskertkim keledi. Bıshimbaevqa qatysty isti basqa vedomstvo tergep jatyr - Sybaılas jemqorlyqqa qarsy is-qımyl ulttyq búrosy. Ol qylmystyń basqa túri boıynsha kúdikke ilingen - aldyn ala kelisim boıynsha top bolyp birneshe márte asa iri kólemde para aldy degen kúdik", - dep málimdedi Sarmanov.
Osyǵan baılanysty Maılybaevtyń advokaty bul eki istiń ózara baılanysy joq ekenin naqtylap otyr.
"Eki túrli adam jáne eki túrli qylmys quramy. Eki túrli qylmystyq is, bir-birimen baılanyspaıdy. Joǵary laýazymdy tulǵalarǵa qatysty qoǵamdy dúrliktirgen basqa qylmystyq istermen baılanysy joq. Maılybaevtyń isinde respýblıkalyq búdjetten 1,3 mıllıard teńge jymqyrylǵany jaıly bir BAQ-ta jylt etip shyqqan jańalyq týraly málimet joq", - dedi advokat.
"Baǵlan Maılybaev memlekettik qupıalarǵa baılanysty qylmystyq quqyqbuzýshylyq jasady dep kúdikke ilingen, bul týraly QR Ulttyq qaýipsizdik qyzmetiniń baspasóz qyzmeti naqty ári resmı túrde habarlady. Túrli boljam men qaýesetter, jýrnalıser men saıasattanýshylardyń túrli boljamdary durys emes jáne kúdikti Baǵlan Maılybaevqa qatysty sotqa deıingi ádil tergeýge kedergi keltirýi múmkin, sóıtip, qoǵamda qate pikir qalyptastyrýy múmkin", - dedi Jomart Sarmanov.
Eske salaıyq, osyǵan deıin Memleket basshysynyń Jarlyǵymen Baǵlan Maılybaev Qazaqstan Respýblıkasy Prezıdentiniń Ákimshiligi Basshysynyń orynbasary qyzmetinen bosatylǵany belgilip bolǵan edi. Keıin onyń qamaýǵa alynǵany jaıly aqparat tarady. Bir apta ótkende Marat Tájın Prezıdent Ákimshiligi basshysynyń birinshi orynbasary bolyp taǵaıyndalǵan. Sol kezde osy taǵaıyndaýǵa qatysty pikir bildirgen saıasattanýshy Dosym Sátbaev Tájınniń taǵaıyndalýy Prezıdenttiń jas kadrlardan kóńili qalǵanyn kórsetedi dep málimdegen edi.
