Aqtóbede endi kórinip kele jatqan jas talantty kózi shalǵan oblys basshysy Berdibek Saparbaev onyń anasyna balaǵa durystap qaraý kerektigin jetkizdi, dep habarlaıdy «Tilshi».

«Balańyz shamamen 13-15 jas shamasynda shyǵar. Er balanyń daýysy ózgeretin kez. Sondyqtan, myna ósip kele jatqan ulyńyzdyń daýysyn kútińiz»,  — dedi Berdibek Saparbaev talantty jasóspirimniń anasyna qarap.

Oblys basshysy balalardy toılarǵa shyǵarmaý kerektigin aıtty.

«Talantty balalar jer-jerde kórinedi, biraq úlken sahnalarǵa shyǵa almaı qalady. Kútiný kerek qoı. Onyń ústine qazaqta kóz degen bar. Jalpy, mundaı balalardyń toıǵa shyǵyp, óner kórsetýine qarsymyn», — dedi Berdibek Saparbaev.

Mektep jasyndaǵy balalardyń toılarda óner kórsetýine qarsylyǵyn bildirgen óner qaıratkeri Oral Baıseńgir de bolashaǵynan zor úmit kúttiretin balanyń kásibı turǵyda shyńdalǵanyn qalaıtynyn jasyrmaıdy. Onyń paıymynsha, talantty balaǵa barlyq jaǵdaıdy jasaý kerek.

Er balanyń daýys kútimine qatysty ánshi Svetlana Aıtbaeva da óz oıyn jetkizdi.

«Balany toıǵa shyǵarǵan durys emes, árıne. Eń aldymen ol balanyń aǵzasyna keri áserin tıgizedi. Tún uıqysy durys bolmaıdy. Toıda sharshaıdy, kezegin kútedi, tońady. Ekinshiden, balanyń psıhıkasyna keri áser etedi. Toıdaǵy túrli jaǵdaıdy kóredi. İshken adamdar, tóbeles, kelispeýshilikter. Odan bólek, óner kórsetken balaǵa qonaqtar aqsha usynady. Keıbir balalar jerge tastaǵan aqshadan kóz almaı qarap turady. Án men aqshanyń arajigin aıyra almaıtyn jaǵdaıǵa jetedi», — deıdi Svetlana Aıtbaeva.

Ánshi sonymen qatar er balalardyń daýysynda mýtasıa bolatynyn aıtty.

«Rasymen de, balany, ásirese, ótpeli kezeńde toılarǵa shyǵarýǵa bolmaıdy. Daýysqa salmaq túsirmeý kerek. Mýtasıa aıaqtalǵansha kútken abzal. Dımash (Qudaıbergen — red.) kópshilik aldyna tek 15-16 jasynda shyǵa bastady. Tanystarymyz «balańyzdyń mynadaı daýysy baryn bilmedik qoı» dep tańdanystaryn da jasyrmaı jatty», — deıdi ánshi Svetlana Aıtbaeva.