Qazaqstannyń soltústik aımaǵynda jańa emıgrasıalyq tolqyn bastaldy dep habarlaıdy ratel.kz, málimettiń qazaqsha nusqasyn "Qamshy" portaly oqyrman nazaryna usynady.
Pavlodar oblysynyń turǵyndary otbasylarymen birge Reseıge kóshý úderisi keń etek jaıa bastady. RF elshiliginiń aldynda kezekte turǵan adamdardyń qarasy kúnnen-kúnge artyp barady, olar "otandastardy kóshirý" baǵdarlamasymen kóshý úshin eki aı buryn kelip tirkelýi qajet eken.
Pavlodar oblysy elimizdegi damyǵan ortalyqtardyń biri jáne bul óńirde joǵary standartty ómirdiń bar bolǵandyǵyna qaramastan, qaladaǵy turǵyn úılerdiń baǵasy arzandap bara jatyr.
Jergilikti bankter ıpoteka berýdi doǵarǵandyqtan emes, baǵanyń arzandaýy, negizinen, emıgrasıalyq prosespen baılanysty.
Jyljymaıtyn múlik satýdy jarıalaıtyn «Krysha» saıty Qazaqstandaǵy turǵyn úı saýdasyna analız jasap, Taraz, Aqtóbe qalalarymen qatar Pavlodardy da arzan úı satyp alýǵa múmkin óńirlerdiń qataryna qosty.
Atalmysh máselege baılanysty Pavlodarda úı satý qıyn bolyp otyr. Sol sebepti de, kóship ketýshilerdiń kópshiligi rsesılik qalalardaǵy jyljymaıtyn múlikpen aýystyrýǵa habarlandyrý berip jatyr.
«Pavlodar qalasyndaǵy páterimdi Novosıbırskidegi Zaelsov aýdanyndaǵy pátermen aýystyramyn nemese satamyn. Úıdiń mańynda mektep, dúken bar...», - degen sıaqty habarlandyrýlar gazet betterinde kóbeıip ketken.
Oblas turǵyndary páterlerin Omsk, Barnaýl, Krasnodar, Túmen, Belgorod, Ekaterınbýrg, Chelábınsk, Kalınıngrad qalalaryndaǵy páterlermen aýystyrýǵa daıyn otyr.
Tipti, rseseılik qurylys kompanıalary soltústik Qazaqstan turǵyndarynyń jappaı habarlama bergenderine tańqalyp, ózderiniń jańa jobalaryn Pavlodarlyqtarǵa tanystyryp, páter satyp alýlaryna keńes bildirip jatyr.
Kóshi qon polısıa qyzmetkerleriniń aıtýynsha, Soltústik Qazaqstan oblysynyń basym kópshiligi Reseıge qonys aýdarady.
Jańa emıgrasıa tolqyny bes jyl buryn bastalyp, jyldan jylǵa kólemi artyp kele jatqan kórinedi.
2010 jyly 2503 adam Reseıge ketken, al 2016 jyly 4204 turǵyn Qazaqstan azamattyǵynan bas tartqan eken.
Bes jyldyń ishinde Reseıge 20 myńnan astam adam qonys aýdarǵan.
Palodar İshki İster Departamenti sońǵy 16 jyldaǵy kóshi qon qujattaryn kórsetti.
Resmı qujattarda kórsetilgendeı, Reseıge jappaı qonys aýdarý 2004 jáne 2008 jyldarda bolǵan eken.
Kóshi qon polısıasy qandaı mamandardyń ketip jatqandaryna qaramaıdy, tek kimder jáne qansha adam qonys aýdaryp jatqandyǵyn tirkeıdi. Alaıda, qonys aýdarý baǵdarlamasy boıynsha Reseı kimderdi qabyldap jatqandyǵy belgili.
Kóship jatqandardyń kóbisi joǵary bilimdi adamdar. Sebebi, Reseıde ınjener, dáriger, muǵalim jáne bilikti jumysshylarǵa suranys bar eken.
Bilim berý basqarmasynyń aıtýynsha, bizdiń kadrlar – básekege qabiletti mamandar.
Pavlodar zaýyttarynyń basshylary bilikti mamandardyń ketip jatqandaryna birneshe ret shaǵym túsirgen. Daryndy jumysshylardy elde qaldyrý maqsatynda zaýyttar turǵyn úıler salyp, jeńildikpen páter alýǵa usynys ta bildirgen.
Alaıda bul jasalynyp jatqandar jetkiliksiz, bilikti mamandardyń kóbimsi ózge elge qyzmet etýge ketip jatyr.
Aýdarǵan: Nazerke Labıhan
