«Habar» telearnasy «Qazaq válsiniń koroli», kompozıtor Shámshi Qaldaıaqovtyń ómiri men shyǵarmashylyǵyna negizdelgen «Án-aǵa» telehıkaıasyn túsiripti. Tórt bólimdi kartınany 21 qańtardan bastap osy arnadan kórsetilmek, dep habarlaıdy kaz.365info.kz
Týyndyda Shámshiniń jas kezin somdaǵan Astanadaǵy «Jastar» teatrynyń akteri Dáýren Serǵazın kartınany túsirý kezindegi qıyndyqtar men qyzyqtar týraly áńgimelep berdi.
– Shámshi Qaldaıaqov tarıhı tulǵa, ómirde bolǵan adam. Sondyqtan bul rólge qalaı daıyndaldyńyz?
— Shámshi atamyzdyń ómirine negizdelgen fılm túsiriledi, sizdi basty rólderdiń birine qarastyryp jatyrmyz degen kúnnen bastap, mazam ketti. Túsirý jumystaryna eki aı qalǵanda uıqym da buzyldy. Óıtkeni bul obrazdyń jaýapkershiligi óte úlken. Ol kisiniń kózin kórgender bar, januıasy, týystary tiri. Kompozıtordyń beınesin barynsha shynaıy etip berý kerek. Sol úshin uzaq ýaqyt daıyndaldym, Shámshi atamyz týraly kitaptardy aqtaryp, beınejazbalardy qarap shyqtym. Biraq ol kisiniń jas kezinen qalǵan beınejazbalary joq, sondyqtan ol qandaı adam boldy degen suraqtar kóp mazalady. Shámshi atamyz týraly estelikter, dostary jazǵan maǵlumattardy kóp oqydym. El aýzynan, ol kisini kórgen kisilerdiń áńgimelerin tyńdap, ishki jan-dúnıesin zerttep, zerdeledik. Halyqqa eń mańyzdysy ol kisiniń óneri, ánderi.
– Akter Dáýren men Shámshiniń arasynda uqsastyqtar bar ma?
– Ár obrazdan ózińe uqsas jerlerdi tabasyn, Shámshide de dál solaı. Beıneńniń keıbir jaqsy qasıetteri, keıbir jaman qasıetterin salystyrasyń. Biraq Shámshi atamyzdyń jaman qasıetteri boldy dep aıta almaımyn.
– Túsirilim kezinde qandaı qıyndyqtarmen keziktińizder?
– Kıno – úlken óner, qıyndyqsyz bolmaıdy. Kartına shynaıy shyǵý úshin túsirilim barysynda azdap mandolına úırenýge týra keldi, gıtara, dombyra, osy aspaptardy kınoǵa engizý biraz daıyndyqty talap etti. Eń basty qıyndyqty aýa-raıy týǵyzdy. Fılmde kóktem, jaz, qys mezgilderin kórsetemiz, alaıda túsirý jumystary qysta ótkendikten, kóp qolaısyzdyqtar boldy. Degenmen bári de sátti shyqqan sıaqty. Ony telehıkaıany kórgen soń baǵalarsyzdar…
– «Án-aǵa» serıalynda jandy daýysta án oryndaısyz ba?
– Tiri daýysta keremet án oryndaıtyn adam emespin. Biraq tarıh boıynsha, Shámshi aǵamyzǵa sýyq tıip, daýysynan aırylyp qalǵan bolatyn. Sondyqtan shyrqap án salyp turǵanym shyndyqqa janaspaıtyn edi. Sol sebepti biz kartınada azdap yńyldap, óz ánderin shama-sharqynsha aıtýǵa tyrystyq.
Jalpy, joba óte qyzyq ótti, tarıhı obrazdardy somdap, atsalysqan áriptesterime alǵys bildirgim keledi. Áli de maza, áli de qorqynysh oıdan ketpeı tur. Sebebi fılm qalaı shyǵar eken, halyqtyń baǵasy qalaı bolar degen oılar mazalaıdy.
Rejıseri: Jasulan Poshanov
Senarı avtorlary: Jaıyq Syzdyqov, Muhamed Mamyrbekov
Kompozıtordyń túrli kezeńderdegi obrazdaryn Dáýren Serǵazınmen birge Nurbol Meırambaev jáne Meıirbek Qaýymbaev somdady.
Telehıkaıany 21 qańtardan bastap saǵat 20.00-de «Habar» arnasynan kórińizder! 4 bólimdi tarıhı drama senbi jáne jeksenbi kúnderi efırge shyǵady.
