Túrkıa prezıdenti Redjep Taııp Erdoǵan DAISH-tyń astyrtyn áreketterine jáne Sırıanyń munaı kontrabandasyna qatysy bar dep habarlaıdy eadaily.com. Bul týraly Sırıa prezıdenti Bashar Asad japondyq telearnaǵa bergen suhbatynda málimdedi.  

«Eger ashyq aıtsam, DAISH 2006 jyly Irakta AQSH-tyń baqylaýymen quryldy. Sırıa qaıshylyǵy bastalǵanda Túrkıa bul uıymǵa demeýshilik etti. Sebebi DAISH sırıalyq munaı ken ornyn shıkizat eksportyna paıdalandy. Túrkıa Erdoǵannyń basshylyǵymen munaı kontrabandasyna aralasty. Sondyqtan Túrkıa men AQSH-tan  DAISH-pen shynaıy kúresti kútýdiń qajeti joq» deıdi Bashar Asad.  

Asadtyń oıynsha Erdoǵan DAISH terrorısteri men «Djebhat An-Nýsraǵa»  qarsy shyqqandaı bolady, shyn mánisinde atalmysh uıymǵa qoldaý bildirip otyr. Al onyń kómeginsiz olar ómir súrýin toqtatady dep esepteıdi Sırıa prezıdenti.

Suhbatta Asad Damaskte hımıalyq qarý qoldanǵany týraly aqparatty joqqa shyǵardy.

«Bul múmkin emes. Eń aldymen moraldyq turǵydan múmkin emes. Sebebi eshkim óz halqyna qarsy halyqty qyryp salatyn qarýdy qoldanbaıdy. Onyń ústine biz 2013 jyly hımıalyq qarýdy paıdalanýǵa tyıym salatyn kelisimge qol qoıyp, barlyq arsenaldan bas tarttyq. Bizde ondaı qarý joq. Hımıalyq qarýdy alǵash 2013 jyly terrorıster qoldandy».

Sırıa bıligi sol ýaqytta BUU Sırıaǵa arnaıy tekserý komısıasyn jiberýin surady. Biraq bul bastama AQSH tarapynan qarsylyqqa ıe boldy.

«Sebebi komısıa Sırıaǵa kelse, terrorıstter áskerge qarsy hlordy qoldanǵany týraly naqty dálelderdi tabýshy edi» deıdi Sırıa prezıdenti.

EADaily habarlaǵandaı 23 qańtarda Astanada Sırıa máselesi jóninde kezekti kelissózder júrgiziledi. Sırıa armıasy men opozısıanyń qarýly toby da keledi dep kútilýde. Onda qarýly qaqtyǵysty toqtatyp, rejımdi qoldaý máseleleri qaralmaq.