AQSH Ortalyq barlaý basqarmasy (OBB) 1995 jyly Bıll Klıntonnyń prezıdenttik jarlyǵymen qupıalylyǵyn joǵaltqan 775 myń qujatty (13 mln. betten turady) jarıa etti. CREST (CIA Records Search Tool,) muraǵatynda qyrǵı-qabaq soǵys kezindegi OBB qyzmeti jaıly aqparattar jáne birneshe betten turatyn saraptamalar, ǵylymı zertteýler bar. «QazAqparat» HAA Qazaqstanǵa qatysy bar 6100 CREST materıalyna sholý jasap shyqqan.
Olardyń basym bóligi keńestik ǵalymdardyń ǵylymı referattarynyń, Qazaq memlekettik sáýlet-qurylys akademıasynyń, S.M.Kırov atyndaǵy Qazaq memlekettik ýnıversıtetiniń, aýyl sharýashylyǵy, energetıka jáne t.b. arnaıy mamandanǵan QazKSR ınstıtýttarynyń eńbekteriniń aýdarmasy. Qazaq KSR Ǵylym akademıasynyń qyzmetine erekshe nazar aýdarylǵan: kadrlyq aýys-túıister men «Qazaq KSR Ǵylym akademıasynyń habarshysynda» jaryq kórgen sımpozıýmdar men jarıalanymdar baqylanyp otyrǵan. Muraǵat mazmunyna qarap, AQSH Barlaý basqarmasynyń KSRO sekildi QazKSR-ǵa da asqan qyzyǵýshylyq tanytqanyn kóremiz. Muraǵatta ekologıa, mal sharýashylyǵy, etnopsıhologıa, geografıa, geofızıka, geologıa, medısına, ıadrolyq fızıka, metalýrgıa, lıngvısıka, gıdrometeorologıa jáne ózge salalar boıynsha ǵylymı zertteýlerdiń anotasıalary bar. Kóptegen gazet qıyndylary, KSRO kitaptarynyń aýdarmalary (Máselen, «Neke jáne otbasy qarym-qatynastary»), «Ǵylym jáne ómir» jýrnalynyń úzindileri jáne radıobaǵdarlamalardyń stenogrammasy - Keńes Odaǵy respýblıkalary jaıly aqparattyń tirnektep jınalǵanyn dáleldeıdi.
Muraǵatta saqtalǵan Shyńjań qazaqtarynyń ómir salty jáne Tıbetke aýǵan qazaqtar jaıly maǵlumattar qazaq tarıhshylary men zertteýshileriniń qyzyǵýshylyǵyn týdyrary sózsiz. Máselen, Shyńjań qazaqtary qarym-qatynasqa jeńil, sypaıy, qonaqjaı jáne turmysta tazalyqty súıetin halyq dep kórsetilgen. Jaǵymsyz qylyqtary jóninde jalqaýlyq, jigitterdiń orynsyz batyrsynatyny jazylǵan. Sondaı-aq, muraǵattaǵy derekterde kóshpendiler taǵamynyń 50% sútten, 40% - etten jáne 10% - jarmadan turatyny aıtylǵan. «Olar kókónis múldem jemeıdi, esesine, etti súısine jeıdi. Jaqsy kóretin delıkatesteri - jylqy etinen jasalǵan shujyq. Qoı etine qol jetimsiz kedeı adamdar negizinen, sútpen jáne irimshikpen tamaqtanady, al baılar qoı etine basymdyq beredi. Jylqylar qazaq aýyz ádebıetinde ásem, batyl jáne soǵysta senimdi serik retinde aıtylyp kelgen. Jylqylar arasynda aq attyń eti delıkates sanalady, al qoılardyń ishinen sary bastylardy unatady. Qazaqtar qymyzdy jaqsy kóredi... Olar óte myqty kóshpendiler», - delingen barlaýshylardyń habarlamasynda.
