Qyrǵyz prezıdenti Almazbek Atambaev "Ákimshilik jaýapkershilik týraly kodekske túzetýler engizý" týraly zańǵa qol qoıdy. Qujat qoǵamdyq oryndarda ishimdik ishken, bylapyt sóz qoldanǵandardy ákimshilik jazaǵa tartýdy qarastyrady. Ortalyq Azıa jańalyqtar qyzmetiniń jazýynsha, bul týraly prezıdenttiń baspasóz qyzmeti habarlady.

Resmı aqparat boıynsha, zańnyń maqsaty - qoǵamda adamgershilik pen jastar tárbıesin arttyrý, qoǵamdyq oryndarda spırttik ishimdikter men esirtki zattaryn paıdalanýǵa jol bermeý.

Habarlarǵa qaraǵanda, qoǵamdyq tártipti buzǵandar 1 myńnan 3 myń somǵa deıin aıyppul tóleıdi. Jaýapqa tartylǵan azamattar aıyppuldy tóleı almasa, olardy segiz saǵattyq qoǵamdyq jumysqa salady nemese bes táýlikke qamaıdy.

Zań jobasynda alkogóldik ónimder nemese esirtki zattaryn kámelet jasqa tolmaǵandardyń qoldaný máselesine kóńil bólingen. Mundaı zań buzýshylyqtar úshin jasóspirimderdiń ata-analaryna 2 myńnan 3 myń somǵa deıin aıyppul salynady.

Zańda qoǵamǵa jat qylyq jasaǵan jasóspirimderge jaza qataıtylǵan. Mundaı buzaqylyq úshin 5-10 myń som aıyppul salynady.