Almaty halyqaralyq áýejaıy men eki temir jol vokzalyndaǵy qaýipsizdik kúsheıtildi. Bul Almatyda Ýnıversıada oıyndarynyń ótýine baılanysty dep habarlady «Habar 24» arnasy. Almatyǵa jahandyq jarysqa qatysýshylar qańtardyń 16-nan kele bastady. Qonaqtardy qarsy alyp, olardyń júkterin baqylaýdan ótkizgenge deıingi qaýipsizdikti táýligine 800-deı beınekamera jáne 200-den astam tártip saqshysy qadaǵalaıdy.

Quqyq qorǵaýshylar qajetti tehnıka jáne kólikpen qamtamasyz etilgen. Oǵan qosa, Avstrıa men Almatyda úıretilgen 12 ıisshil ıt te bar. Kınologtardyń aıtýynsha, úıretilgen tóbetter jarylǵysh zattyń jeti, al esirtkiniń bes túrin anyqtaı alady.

Sondaı-aq, Qazaqstan Respýblıkasy Premer-mınıstriniń birinshi orynbasary Asqar Mamın Ýnıversıada nysandarynyń jahandyq jarysqa daıyndyǵyn pysyqtady. Keshendi aralap, qaýipsizdik jumysyn saralaǵan Úkimet basshysynyń birinshi orynbasary Halyqaralyq jarysta tártip saqshylary men qaýipsizdik qyzmetiniń ózge de ókilderine úlken jaýapkershilik júkteletinin eskertti. Ýnıversıada oıyndarynda qaýipsizdik máselesi erekshe nazarǵa alynǵan. Barlyq sporttyq nysanda 2 myń beınebaqylaý kameralary ornatyldy. Jalpy jarys ótetin kúnderi 7700 tártip saqshy el tynyshtyǵyn baqylaıdy. Sonymen birge tótenshe jaǵdaı qyzmetinen 660 adam, arnaıy tehnıkalar men tikushaq jumyldyrylyp otyr. Meımandar men sportshylarǵa yńǵaıly bolý úshin mıgrasıalyq rásimdeý jumystary da ońtaılandyrylǵan.

QR İshki ister mınıstriniń orynbasary Erlan Turǵunbaevtiń aıtýynsha, Qaladaǵy 400 qonaq úı men atletter aýylynda kóshi-qon polısıasynyń ókilderi jumys isteıdi. Sol arqyly qonaqtar men sportshylar ǵalamtordy qoldana otyryp elektrondy portalmen vıza rásimdeı alady. Jalpy Ýnıversıada nysandary 100 paıyz daıyn.