«Bilim, sport jáne mádenıet – dál osy salalar álemge turaqtylyq pen damýdy qamtamasyz ete alady», - dedi jýrnalıser aldynda sóılegen sózinde FISU prezıdenti Oleg Matysın.
Keshe tańerteń 28-shi Dúnıejúzilik qysqy ýnıversıadaǵa qatysý úshin Halyqaralyq stýdenttik sport federasıasynyń (FISU) prezıdenti Oleg Matysın Almatyǵa keldi. Joǵary laýazymdy sport sheneýnigin áýejaıda Almaty qalasy ákiminiń orynbasary Arman Qyryqbaev jáne Ýnıversıada-2017 Dıreksıa basshysy Naıl Nýrov qarsy aldy.
FISU prezıdenti ushyp kelgen reıs toqtatylǵandyqtan, ushaq Almatyǵa azdap keshigip jetti. Alaıda Ýnıversıada Uıymdastyrý komıtetiniń qonaq qurmetine arnap daıyndaǵan qazaqtyń «shashýy» arqasynda bul jaıt bilinbeı ketti.
Oleg Matysın jarystar aldynda ótkiziletin FISU atqarý komıtetiniń qorytyndy májilisine qatysý úshin Ýnıversıadanyń ashylý saltanatynan buryn kelip otyr. Almatydaǵy Ýnıversıadaǵa daıyndyq barysy jóninde sóz qozǵaǵan Matysın osyndaı aýqymdaǵy sport jobasy FISU, Ýnıversıada uıymdastyrý komıteti, ulttyq stýdenttik federasıalar men qala ákimshiligi arasyndaǵy ózara árekettestikti úılesimdi túrde uıymdastyrýdy qajet etetindigin jáne de ol is júzinde kúrdeli mindet ekenine toqtalyp ótti. FISU prezıdenti oıyndarǵa daıyndyq barysynda ózi jáne FISU músheleri Almatyǵa baqylaýshy emes, birtutas jumys komandasynyń múshesi retinde kelip otyrǵanyn da atap ótti.
FISU prezıdenti óz súıikti isimen aınalysyp, álemniń túrli ýnıversıtetteri atynan Ýnıversıadaǵa qatysaıyn dep otyrǵan sportshylarǵa myqty densaýlyq tiledi. Oleg Matysınniń pikirinshe, Ýnıversıadanyń basty mindeti – qatysýshylarǵa bir-birimen qarym-qatynastan qýanysh sezinip, óz elderine aýyzbirshiligi jarasqan sport áleminiń bir múshesi retinde qaıtýy úshin jaǵdaı jasaý.
«Sport – beıbitshiliktiń elshisi», - dep sózin qorytyndylady FISU prezıdenti Oleg Matysın.
Oleg Matysın 2015 jyldyń qarashasynda FISU prezıdenti bolyp taǵaıyndaldy. Osy laýazymǵa deıin ol FISU birinshi vıse-prezıdenti bolyp qyzmet atqarǵan, sondaı-aq, osydan aldyn Reseı stýdenttik sport odaǵyn basqarǵan bolatyn.
