«Astana Arlans» klýbynan shı shyqty. Óner janashyry Erlan Tóleýtaı mańdaı teriniń aqysyn ala almaı júrgen klýb boksshylarynyń sotqa júginip jatqanyn aıtyp dabyl qaqty.
«Ardaqty aǵaıyn! Qazaq boksy, jalpy qazaq sporty belshesinen bylyqqa ábden batqan. Ol dert - korrýpsıa! Bir ǵana mysal aıtaıyn, 2015 jyly "Astana arlans" klýby álemniń barlyq komandasyn qırata jeńip, Álem chempıony degen abyroıly ataqty jeńip alǵan bolatyn. Bul joly AIBA bas júldege 400 000 dollar syıaqy tikken edi. Obaly neshik, AIBA ýádesinde turyp, ol qarjyny ıaǵnı 400 000 dollardy "Samuryq Qazyna" ál - aýqat qorynyń esep shotyna aýdarǵan. Bul qarjy atalmysh qordyń qamqorlyǵyna alynǵan "Astana"sport klýbynyń esep shotyna túsken. "Astana arlans" klýby boksshylarynyń taban aqy, mańdaı terleri - bul aqshany sodan beri eshkim kórmegen. Sonyń kesirinen byltyrǵy maýsymdy bapsyz bastaǵan "Astana arlans" klýby Búkil álemdik boks serıasy boıynsha qola júldege ǵana qol jetkizdi. ( Aqshasyn bermeı qoısa, kim bokstassyn?) Zilder aýyr soqqylarǵa tumsyqtaryn tósep júrip tapqan aqshalaryn ala almaǵan "Astana arlans" boksshylarynyń ashpaǵan esigi, tozdyrmaǵan tabaldyryǵy qalmaǵan. Tipti Elbasyna hat ta jazǵan! Elimizdiń atyn álemdik sport arenasynda san márte dúrkiretip shyǵarǵan ataqty "Astana arlans" sport klýbynyń jeńip alǵan júldesin bermeı qoıý, ne degen masqara. Bul endi shekten shyqqandyq emes pe?! Bundaı qarjylyq mahınasıalardy kórmeı, fınpol qaıda qarap otyr. Ulttyq qaýipsizdik komıteti ult sportyna jemqorlar tarapynan qaýip tóngende nege iske aralaspaýda!
Jýrnalıser, qazaq boksyn aýyzdaryńnyń sýy quryp maqtaı bergenshe, osyndaı masqaralardy nege jazbaısyńdar? Nege jýrnalısik zertteý júrgizbeısińder? Álemge qazaqtyń atyn shyǵaryp kelgen sport - ol osy boks edi, sol sporttyń bolat bilek oǵlandary edi ǵoı. Endi sol boksty mynandaı indet jaılaýda! Bul keselmen barlyǵymyz birigip kúreseıik. Jemqorlardyń ýly tyrnaǵynan qazaq sportyn qutqaraıyq! Olardyń nájiske toly sasyq jemsaýlaryna jutylyp jatqan boksshy jigitterimizdiń aq adal eńbegin el - jurt bolyp alyp bereıik! Qazir osynaý jemqorlyq iske baılanysty sot prosesi bastaldy. Elimizdegi BAQ quraldary, jýrnalıser Astanada bastalǵan sot prosesin qadaǵalaýǵa, kópshilikke jetkizýge, sottyń ádil úkim shyǵarýyna yqpal etýge shaqyramyn! Ún qosyńyzdar aǵaıyn!», - dep jazdy Erlan Tóleýtaı.
Sport.kz saıty jazýynsha da, boksshylardyń shaǵym túsirýiniń sebebi – Álemdik deńgeıde besinshi ret ótken WSB boksynda «Astana Arlans-qa» AIBA $400 000 kóleminde syıaqy bólgen, alaıda bul qarajat jattyqtyrýshylar men sportshylardyń qolyna tımegen. Máseleni tyńǵylyqty sheshý úshin chempıondar sotqa júgingen eken.
İske qatysty shaǵym túsirgenderdiń sany 24, olardyń qatarynda Erik Áljanov, Samat Bashenov, Beıbit Esjanov, Mardan Berikbaev, Jomart Erjan, Muhamedjan Erkin, Qaırat Eralıev, Mıras Jaqypov, Nurdaýlet Jarmanov, Erjan Musafırov, Zákir Seıfýllın jáne Meıirbolat Toıtov bar. Syıaqyny Astana Arlans-qa qaıtarýmen qatar sportshylar árbir shaǵym túsirýshilerge 200 000 teńge moraldyq tólem talap etip otyr.
