Prezıdenttiń aıtýynsha, Qazaqstan beıbitsúıgish memleket jáne BUU Qaýipsizdik keńesiniń turaqty emes múshesi retinde Taıaý Shyǵys óńirinde qaýipsizdik pen turaqtylyqtyń ornaýyna jáne nyǵaıýyna múddeli.

«Búgingi basqosý halyqaralyq qoǵamdastyqtyń Sırıadaǵy jaǵdaıdy beıbit túrde retteýge baǵyttalǵan jiger-yntasynyń aıqyn kórinisi bolyp tabylady. Qazaqstan Sırıadaǵy jaǵdaıdy retteýdiń jalǵyz durys joly - ózara senim men túsinistikke negizdelgen kelissózder bolýy qajet dep sanaıdy», - deıdi N.Nazarbaev.

Elbasy atap ótkendeı, bizdiń elimizdiń búgingi kelissózderdi ótkizý orny retinde tańdalýy kezdeısoq emes.

«Ózderińiz biletindeı, 2015 jyly Astanada birqatar sırıalyq opozısıa toptary kelissózderiniń eki raýndy ótti. Sırıa halqyna túsken aýyrtpalyqty jeńildetý maqsatynda sırıalyq bosqyndarǵa 700 myń dollardan astam kólemde qarajat bóldik, jaqynda 500 tonna azyq-túlik túrinde izgilik kómek joldadyq. Astanadaǵy kezdesý barlyq múddeli taraptardyń BUU-nyń aıasynda Jeneva úderisiniń sheńberinde sırıalyq daǵdarysqa qatysty ońtaıly sheshim tabýyna qajetti alǵysharttardy qamtamasyz etip, Sırıa jerinde beıbitshilik pen turaqtylyqty ornatý isine laıyqty úles qosady degen senim bildiremin. Búgingi kelissózderdiń nátıjeli ári jemisti bolýyna tilektespin», - degen Prezıdent úndeýinde.

Aıta keteıik, Astanadaǵy kelissózderge Sırıa úkimeti, sırıalyq opozısıa, Reseı, Túrkıa jáne Iran úkimetiniń ókilderi, sondaı-aq, BUU Bas hatshysynyń Sırıa boıynsha arnaıy ókili jáne Qazaqstandaǵy AQSH elshisi qatysady.

Sırıa máselesin retteý boıynsha kezdesý - Reseı men Túrkıa prezıdentteriniń bastamasy. Qazaqstan kelissózder ótkizýge tek alańqaı usynyp otyr, ózi bul proseske qatyspaıdy.

Astana prosesinen 400-den astam jýrnalıs búkil álemge aqparat taratady. Kelissózderge 320 sheteldik jáne 120 qazaqstandyq tilshi tirkelgen. Jýrnalıserge arnaıy baspasóz ortalyǵy uıymdastyryldy. Kezdesý eki kúnge josparlanǵan.