Astanada Sırıadaǵy jaǵdaıdy retteýge baılanysty kelissóz júrgizý prosesi aıaqtaldy, - dep habarlaıdy Tengrinews.kz tilshisi.
Astanada 23 qańtar kúni bastalǵan sırıalyq kelissózder 24 qańtarda tústen keıin aıaqtaldy. Qorytyndy qujattardyń mátinin Qazaqstannyń syrtqy ister mınıstrligi Qaırat Abdrahmanov oqydy.
Sırıa opozısıasynyń ókilderi Reseı, Túrkıa taraptary men BUU arnaıy elshisiniń qatysýymen ótken kelissózderdi nátıjeli dep atady. Taraptar álemdegi atys-shabysty toqtatý máselelerin talqylady. Sondaı-aq, gýmanıtarlyq jaǵdaı men tutqyndardy bosatý jaıly aıtyldy.
Sondaı-aq, keshe kelissózder barysynda Qazaqstannyń SİM vıse-mınıstri Roman Vasılenko bastapqyda kelissózderge qatysýshylardyń barlyǵynyń bir ústel basynda áńgimeleskenin, biraq keıinnen olardyń kelissózder bólmesine ketip qalǵandaryn aıtqan bolatyn.
"Árbir delegasıa úshin arnaıy kelissóz bólmesi bar: sanap kórińizdershi, úsh demeýshi memleket, BUU, Úkimet jáne opozısıa", - dedi Roman Vasılenko.
Eske sala keteıik, keshe, 23 qańtarda Astanada Sırıadaǵy jaǵdaıdy retteýge qatysty kelissózder bastalǵan bolatyn. Kelissózder elordadaǵy Rixos President Astana meımanhanasynda jabyq tártipte ótip jatyr. Sondaı-aq, keshe Memleket basshysy BUU Bas hatshysynyń Sırıa boıynsha arnaýly elshisi Staffan de Mıstýramen kezdesken bolatyn. Nursultan Nazarbaev Sırıa máselesi búginde Taıaý Shyǵysty ǵana emes, búkil álemdik qaýymdastyqty alańdatyp otyrǵanyn atap ótken edi.
