22 qańtar kúni Almaty qalasyndaǵy "Qabyldaý úıinde" qazaqtyń aıaýly uly, 50 jasynda aramyzdan ozǵan Asqar Jakýlınge týǵan-týystary as berdi.
Myń qaraly adam jınalǵan astyń tizginin belgili aqyn Almas Ahmetbekuly ustady. Qazaq salty boıynsha marqumnyń jary sońǵy ret joqtaý aıtty, asqa jınalǵan jurt Asqardyń aǵaıyn-týys baýyrlaryna toqtaý aıtty.
As barysynda Asqar Ánýarulynyń ómiri men qaıratkerligi týraly derekti fılm kórsetilip, qımas dostary, týystary óshpes estelikter aıtyp eske aldy. Asqardyń izgi isin jalǵap, ornyn oısyratpaı otyrǵan jary Jaına Jakýlınanyń «Asqar Jákýlın atyndaǵy qaıyrymdylyq qory» aınalysyp jatqan izgi ister de kórsetildi. Asqar ómirden ozǵan soń kóp ótpeı qurylǵan qaıyrymdylyq qor Asqar Ánýaruly jazylmaı ketken obyr dertimen aýyratyn jandarǵa, balalarǵa kómektesýdi maqsat tutady. Qor búginge deıin naýqastarmen qatar túrli aýrýhanalarǵa jıyny 60 mıllıon teńgeden astam kómek kórsetip úlgergen.
Asta Asqar Ánýarulynyń Atamekeni, aıyryqsha súıetin Aqsýatynan, Tarbaǵataı aýdanynan atqa miner azamattar arnaıy keldi. Tarbaǵataı aýdany ákimi atynan kelgen ákimniń orynbasary Qaırat Maýadınov Asqar Ánýaruly 50 jasqa tolǵanda ol kisige "Tarbaǵataı aýdanynyń qurmetti azamaty" ataǵyn berýge sheshim qabyldanǵanyn, biraq bul ataqty Asekeńniń kózi tirisinde bere almaı, ómirden ozǵan soń týysqandaryna tabystap jatqanynan ókinish bildirdi. Sondaı-aq, Jaına Jakýlınaǵa SHQO bilim departamentiniń alǵys haty tapsyryldy.
2016 jyly 2 aqpanda asyldyń synyǵy Asqar Jakýlın Beıjińde dúnıeden ozǵan edi. Ol óz ósıeti boıynsha Almatyda jerlendi.
Asqar ózi Qytaıda týyp-ósken, biraz jyl Germanıada turdy. Keıin Qytaıǵa qaıta kelip, Pekınde úlken jeke menshik qurylys kompanıasyn quryp, iri ǵımarattar turǵyzdy. Baı boldy, úılendi. Sóıte tura sábıli bolar sátterinde Pekındi, baılyqty bárin tastap, jary Jaınany jetelep, Táýelsiz Qazaqstanǵa - Almatyǵa birjolata oraldy. Onymen suhbattas, syrlas bolǵan azamattar onyń sonshama tereń bilimdi ekenin, Eline, ultyna, ulttyq memleketine degen súıispenshiligi sheksiz ekenin jáne onyń bıik mádenıetti ári jaısań azamat ekenin biledi. Ol atymtaı jomart, úlken mesenat edi. Qazaqstanǵa kelgennen keıin, ol "Asaı" degen kompanıa quryp, ony bıik qarjylyq mekemege aınaldyrdy.
Eske sala keter bolsaq, Asqar Ánýarulynyń týǵan kúni 7 qarashada Jaına Jákýlınanyń jan jaryna jazǵan júrekti eljireter haty jarıalanyp, oqyrmannyń ystyq yqylasyna bólengen.
