Qaıyrymdy is jasaý úshin kóp nárseniń qajeti joq. Tek aınalańa bir qarap qoıyp, ózińde bar nárseńmen bólisseń jetedi. Meıli, ol materıaldyq dúnıe bolsyn, rýhanı bolsyn. Londondyq úısiz adam da solaı istedi. Ol 22 jasarlyq Sharlott Ellıss pen Teılor Ýoldondy aıazdy kúni tońyp qalýǵa jol bermeı, qastarynan tabyldy.

«Qamshy» redaksıasy birden úsh adamnyń janyna jylý syılaǵan oqıǵany sizdermen bólisedi.

Sharlott pen Teılor sońǵy poıyzǵa keshigip qalyp, qańtardyń aıazynda tórt saǵat boıy kelesi poıyzdy kútýge májbúr bolady.

Olarǵa úısiz júrgen Djoýı esimdi er adam kelip, olarǵa óziniń paltosy men jamylǵysyn usynady: «Alyńyzdar, qazir sýyq, al sizderge áli uzaq kútý kerek bolady».

Jastar kómegin qabyl alady. Alaıda alǵys retinde jýynyp, uıyqtap, tamaqtanyp alsyn dep ony da úıine shaqyrady.

Djoýı olar qaljyńdap jatyr dep oılap qalady, biraq Sharlott olsyz úıge qaıtpaıtynyn úzildi-kesildi jetkizedi. Sońynda olar dostasyp ketedi jáne bul oqıǵany qyz feısbýkte bólisýdi jón sanaıdy.

Júzdegen adamdar Sharlottyń meıirimdiligine tańyrqasa, keıbiri jastardyń áreketin essizdikke balady. Sharlott: «Adamdar baıybyna barmaı jatyp, sheshim qabyldaı beredi. Oǵan tek qana keregi – adamdardyń oǵan degen senimi. Olar da sizder men bizder sıaqty adamdar».

Jastardyń dostary Djoýıǵa telefon men jańa kıim syıǵa tartady, al 5 kúnnen keıin Sharlott pen Teılor oǵan jumys tabýǵa kómektesedi. Sharlott feısbýginde: «Bireýdiń ómirin áp-sáttte jaqsy jaǵynan ózgertý qandaı ońaı ekenin adamdar túsinedi dep úmittenemin» dep pikir qaldyrdy.