Ortalyq saılaý komısıasy Májilis depýtaty Amanjan Jamalovqa qatysty tekseristiń qorytyndysy boıynsha sheshim shyǵardy, - dep habarlaıdy Tengrinews.kz vedomstvo baspasóz qyzmetine silteme jasap.

Eske salaıyq, 18 qańtarda QR Ortalyq saılaý komısıasynyń otyrysynda 17 qańtarda 365info.kz ınternet-portalynda jarıalanǵan "Tabysty" depýtat Jamalov Qazaqstan Parlamentinen ketýi múmkin" maqalasynda baıandalǵan faktiler boıynsha tekserý taǵaıyndalǵan bolatyn.

Portal materıalynda Jamalovtyń eki JSHS quryltaıshysy ekeni jáne Jamalovtyń Konstıtýsıalyq zań boıynsha bul úshin májilismenniń bosatylýy kerek ekeni habarlanǵan.

"Komısıa músheleri tekserýdi tolyq kólemde júzege asyrdy. Birinshi derekkózderden alynǵan aqparat depýtat A.M. Jamalovtyń óz múlkin senimgerlik basqarýǵa berýge qatysty zańnamada belgilengen is-qımyldardy ýaqtyly jáne zańnamaǵa sáıkes júrgizgenin rastady", - delingen habarlamada.

Osylaısha, usynylǵan rastaýshy qujattarǵa jáne qazaqstandyq zańnamanyń kásipkerlik jáne depýtattyq qyzmettiń úılespeýshiligi týraly normalaryna súıene otyryp, Ortsaılaýkom Qazaqstan Respýblıkasy Parlamenti Májilisiniń depýtaty Amanjan Jamalovtyń QR Konstıtýsıasynyń 52-baby 3-tarmaǵynyń talaptaryn buzbaǵan degen qorytyndyǵa keldi.

Osylaı deı kele, OSK ókilderi Konstıtýsıanyń 52-baby depýtattyń kásipkerlik qyzmetti júzege asyrýyna tyıym salatynyn eske saldy. Osy talapty buzǵan jaǵdaıda, depýtatqa jazalaý sharalaryn qoldanýmen baılanysty máselelerdi daıyndaý QR Ortalyq saılaý komısıasyna júkteledi.

Eske salaıyq, Májilis depýtaty HQKO-da kóz jumǵan er adam jaıly "Ol úıinde de qaıtys bolýy múmkin edi" degen pikirinen keıin áleýmettik jelilerde qyzý talqylana bastaǵan edi.  Osydan soń "Men adamnyń kez kelgen jerde qaıtys bolýy múmkin ekenin aıtqym keldi, al meni joq jerden jalmaýyzǵa aınaldyrdy", - degen ol sońynda marqumnyń týystarynan keshirim suraǵan bolatyn.