Búgin Prezıdent jarlyǵymen Úkimettiń qaıta jasaqtalǵany týraly habarlaǵan edik.
Elbasy Nursultan Nazarbaevtyń Jarlyǵymen Tamara Dúısenova QR Eńbek jáne halyqty áleýmettik qorǵaý mınıstri qyzmetine taǵaıyndaldy. Aıta keter bolsaq, Tamara Bosymbekqyzy atalǵan mınıstrlik tóńireginde 15 jyldan astam ýaqyt qyzmet atqaryp keledi.
2002-2006 jyldary - QR Eńbek jáne halyqty áleýmettik qorǵaý mınıstrliginiń vıse - mınıstri; 2006 - 2008 jyldary - Ońtústik Qazaqstan oblysy ákiminiń orynbasary; 2008 - 2013 jyldary - QR Eńbek jáne halyqty áleýmettik qorǵaý mınıstrliginiń jaýapty hatshysy. 2013 jylǵy 6 aqpannan bastap QR Eńbek jáne halyqty áleýmettik qorǵaý vıse-mınıstri. 2013 jylǵy 10 maýsymnan bastap - Qazaqstan Respýblıkasynyń Eńbek jáne halyqty áleýmettik qorǵaý mınıstriniń m.a., 27 maýsymnan bastap - Qazaqstan Respýblıkasynyń Eńbek jáne halyqty áleýmettik qorǵaý mınıstri, al 2014 jylǵy 6 tamyzdan Qazaqstan Respýblıkasy Densaýlyq saqtaý jáne áleýmettik damý mınıstri qyzmetinde boldy.
Memleket basshysynyń Jarlyǵymen Eljan Birtanov Qazaqstan Respýblıkasynyń Densaýlyq saqtaý mınıstri bolyp taǵaıyndaldy. Bul týraly Aqordanyń baspasóz qyzmetinen habarlandy.
Eljan Amantaıuly Birtanov 1971 jylǵy 18 qazanda Jambyl qalasynda dúnıege keldi. Almaty memlekettik medısına ýnıversıtetin, Arızona shtatynyń ýnıversıtetin, Reseı dıplomnan keıingi medısınalyq bilim akademıasyn, Sharıte Ýnıversıtettik klınıkasyn (Germanıa), Turan ýnıversıtetin, Duke University, Fugua School of Business (AQSH), Global Executive MVA magıstratýrasyn bitirdi. Almaty qalasynda jedel medısınalyq kómek aýrýhanasynyń reanımatolog-dárigeri, Respýblıkalyq toksıkologıa ortalyǵynyń basshysy, QR Densaýlyq saqtaý mınıstrliginiń bas toksıkology, QR Densaýlyq saqtaý mınıstrliginiń «Densaýlyq saqtaýdy damytý ınstıtýty» RMK dırektory, QR Premer-Mınıstriniń keńesshisi, «Ulttyq medısınalyq holdıń» AQ Basqarma tóraǵasynyń orynbasary, QR Densaýlyq saqtaý vıse-mınıstri, «Ulttyq medısınalyq holdıń» AQ Basqarma tóraǵasy bolyp jumys istedi.
2014 jylǵy mamyrdan bastap - Memlekettik-jekemenshik áriptestik jobalaryn súıemeldeý ortalyǵy basqarmasynyń tóraǵasy. 2015 jylǵy 12 qarashadan bastap osy taǵaıyndaýǵa deıin QR Densaýlyq saqtaý jáne áleýmettik damý vıse-mınıstri. Qazaqstan Respýblıkasynyń densaýlyq saqtaý isiniń úzdigi. Medısına ǵylymynyń doktory.
