«Qamshy» portaly – otandyq aqparat keńistiginde ózindik orny bar aqparat quraly. Portalda jarıalanǵan aqparattar men saraptamalar únemi oqyrmandar tarapynan qyzý talqylanyp, qoǵam qyzyǵýshylyǵyn týǵyzyp jatady.
18 qańtar kúni saıtta «BAIAN BAQYTYN TAPTY, BAQYTBEKTİ TÚRMEDEN SHYǴARÝ KEREK» atty materıal jaryq kórdi. Osyǵan baılanysty belgili prodúser Baıan Maqsatqyzy óziniń Instagram paraqshasynda «Qamshy» portalyna qaratylǵan narazy talabyn jarıalady. Onda B. Maqsatqyzy óziniń alǵash ret «Qamshy» portalyna talap jasap otyrǵanyn aıta kelip, BAQ-tan jeke ómirine qatysty aqparattyq etıka saqtaýdy, áıtpegende zańǵa saı quqyǵyn qorǵaıtynyn baıandaıdy. Ol jarıalaǵan hatta – jekemenshik advokattar keńesiniń biri 20 qańtarda advokattyq qyzmetke Baıan Esentaevanyń júgingenin jazady. Esentaeva «Qamshy» portaly jarıalaǵan materıal óziniń ar-ojdany men iskerlik bedeline nuqsan keltirgenine shaǵymdanyp, «Qamshy» portalynyń keshirim surap materıal jarıalaýyn talap etken.
Qurmetti, Baıan Maqsatqyzy!
Siz – Qazaqstan óner áleminde asa tanymal tulǵalardyń birisiz! Sizdiń shyǵarmashylyq ómirińiz kez-kelgen otandasyńyzdy beıjaı qaldyrmaıdy. Oǵan áleýmettik jelidegi oqyrmandaryńyzdyń sany, shyǵarmashylyq ómirińiz týraly jazylǵan materıaldardyń oqylymy dálel! Tanymaldyǵyńyz sonshalyq, sońǵy kezderi sizdiń jeke ómirińizde bolǵan oqıǵalardyń ózi qazaq qoǵamynda qyzý talqyǵa túsip, eldiń jiti nazaryna iligýde.
«Qamshy» portaly – erkin aqparat alańy. Saıt betinde memlekettegi mańyzdy oqıǵalar, saıası jańalyqtarmen qatar eldi eleń etkizgen máseleler jıi jaryq kórip, jarıalanymdarǵa oqyrmandar da ún qatyp, redaksıaǵa habarlasyp jatady. Sondaı belsendi oqyrmandarymyzdyń birimen 18 qańtar kúni portaldyń kezekshi tilshisi Ásem Álmuhanbet sóılesken. Onda oqyrman Sizdiń Qazaqstandaǵy qyz-kelinshekter úlgi tutatyn tulǵa ekenińizdi aıta kelip, ómirińizde sońǵy ýaqytta bolǵan oqıǵalarǵa qatysty óz pikirin bildirgen. «Qamshy» portaly materıaldy aqparat taratý erejelerine súıene otyryp jarıalady. Maqalada oqyrman esimi óz ótinishi boıynsha ózgertilip berilgen.
Qurmetti, Baıan Maqsatqyzy!
Qamshy portaly Sizdiń narazy talabyńyzǵa saı mynany habarlaıdy:
Birinshiden, ózińiz ataǵan materıaldyń aýdıo nusqasy, habarlasqan oqyrmannyń telefon baılanysy bar. Ol málimetter Siz narazylyq tanytyp otyrǵan materıaldyń redaksıanyń ustanymynan týǵan dúnıe emestigine dálel bola alady.
Ekinshiden, Siz narazylyq bildirip otyrǵan materıal advokattar alqasynyń hatynda jazylǵandaı eki tilde emes, tek qazaq tilinde jarıalandy.
Úshinshiden, QR «BAQ týraly» zańynyń talaptaryna saı «Qamshy» portaly joǵaryda atalǵan materıalǵa qatysty jaýap, teristemeler jarıalaýdan bas tartpaıdy. Zańnamaǵa saı, osy jaǵdaıǵa qatysty Sizdiń de kózqarasyńyzdy saıt betinde jarıalaýǵa ázirmiz.
Tórtinshiden, Sizdiń narazylyǵyńyzdy týǵyzǵan materıal avtorynyń pikiri jeke basyńyzǵa qolaısyzdyq týǵyzyp, ar-namysyńyzǵa nuqsan keltirdi dep sanasańyz, atalǵan materıaldy saıttan alyp tastaý múmkindigi qarastyrylatynyn habarlaımyz.
Jazıra Baıdaly, «Qamshy.kz» portalynyń Bas redaktory
