Ústimizdegi jyly Qazaqstanda elektromobılder men olardyń ınfraqurylymyna arnalǵan standarttar ázirlenedi. Bul týraly búgin Májiliste QR Investısıalar jáne damý birinshi vıse-mıınstri Albert Raý málim etti, dep habarlaıdy QazAqparat.

«Olar josparda bar. 2017 jyldan bastap standarttar ázirlenedi. Ondaǵy shamamen 13 nemese 17 standart qazirdiń ózinde qalyptastyrylǵan. Biz bıznespen kelistik. Jetispeıtin standarttardy bıznestiń ózi jasaıtyn bolady. Men memleket esebinen ázirlenetin standarttardy aıtyp otyrmyn. Elektromobılder men óndirýshilerge arnalǵan ıfraqurylymdar standarty  jaıynda sóz bolyp otyr», - dedi ol standarttaý máseleleri jónindegi zań jobasyn tanystyrýdan keıin QazAqparat tilshisine bergen suhbatynda.

Onyń aıtýynsha, elektromobıl satyp alý óte tıimdi. Sondyqtan aldaǵy ýaqytta onyń Qazaqstanda satylý kórsetkishiniń artatyndyǵy boljanýda.

«Biz bir shaqyrymǵa ketetin elektr energıasynyń benzınnen 4 esege az ekendigin eseptep shyǵardyq. Qazirgi ýaqytta elektromobıldiń birdeı modeldegi janarmaımen júretin avtomobılden quny 30-dan 50 paıyzǵa deıin qymbat bolyp tur. Ol 3-4 jyldyń ishinde benzın men elektr energıasy baǵasynyń arasyndaǵy aıyrmashylyqtan ózin-ózi aqtaıdy. Biraq, kez kelgen adam ony satyp ala almaıdy. Eń birinshiden biz standarttardy ázirleımiz. Ekinshiden, birtindep ınfraqurylymyn qalyptastyra bastaımyz. Óıtkeni, qalaı bolǵanda da qazaqstandyqtar elektromobılderdi satyp alady. Muny biz kórip otyrmyz. Ótken jyly Qazaqstan boıynsha birneshe júzi alyndy. Bul biz oılaǵannan da jyldam damıtyn bolady», - dedi Raý.

Aıta keteıik, búgin Májiliste «Standarttaý týraly» jáne «Qazaqstan Respýblıkasynyń keıbir zańnamalyq aktilerine ólshem birligin qamtamasyz etý jáne standarttaý máseleleri boıynsha ózgerister men tolyqtyrýlar engizý týraly» QR zańy jobalarynyń tusaýkeseri ótti. Negizgi baıandamany  QR Investısıalar jáne damý birinshi vıse-mıınstri Albert Raý jasap, depýtattar tarabynan týyndaǵan suraqtarǵa da jaýap berdi.