Memleket basshysy usynǵan bılik tarmaqtarynyń ókilettikterin qaıta bólý Parlamenttiń mártebesin arttyrý jáne Úkimettiń derbestigin kúsheıtý ǵana emes, bul – Qazaqstandaǵy bıliktik qatynastar júıesin shyn mánisinde qaıta túletý. Aıta ketý kerek, bul rette Qazaqstan prezıdenttik respýblıka bolyp qala beredi. Belgili saıasattanýshy, Qazaqstan strategıalyq zertteýler ınstıtýtynyń dırektory Erlan Qarın osylaı deıdi. Bul týraly Baq.kz habarlaıdy.

«Prezıdent konstıtýsıalyq reformalar jónindegi jumys toby usynǵan jobany egjeı-tegjeıli sıpattady. Bul – is júzindegi saıası reformalar. Óıtkeni, bıliktiń tarmaqtary arasyndaǵy ózara is-qımyl prınsıpterin qamtyp otyr», - deıdi saıasattanýshy.

Keshe, 26 qańtarda óziniń halyqqa Úndeýinde Elbasy málimdegendeı, reforma eki negizgi baǵyt boıynsha iske asady. Birinshiden, Prezıdenttiń áleýmettik-ekonomıkalyq prosesterdi retteýdegi birshama ókilettikteri Úkimetke jáne basqa da atqarýshy organdarǵa berilmek. Sonda bul salaǵa Úkimet, mınıstrlikter jáne ákimdikter tolyqtaı jaýap beretin bolady. Sonymen qatar, Úkimetti jasaqtaýdaǵy Parlamenttiń róli kúsheıtiledi. Parlament saılaýynda jeńgen partıa Úkimet quramyn anyqtaýǵa túbegeıli yqpal etetin bolady. Bul mınıstrler kabınetiniń ókiletti bılik aldyndaǵy jaýapkershiligin arttyrady. Bul rette E.Qarın bılik tarmaqtarynyń ókilettikterin qaıta bólý reformasy júrgizilgenimen, Qazaqstan prezıdenttik respýblıka bolyp qala beretinin aıtady.

«...Prezıdent bıliktiń tarmaqtary arasynda joǵary arbıtr rólin jalǵastyrady. Alaıda, Prezıdenttiń endi kúsh-jigerdi strategıalyq máselelerge, syrtqy saıasat pen ulttyq qaýipsizdik máselelerine jumyldyratyny aıtyldy», -deıdi ol.

Sondaı-aq, ol elimizdiń bıliktik qatynastar júıesiniń eski modelinen birtindep arylyp, jańa jaǵdaılarǵa beıimdele bastaıtynyn, bul turǵyda aldaǵy ózgeristerdiń sózsiz oń trend ekenine toqtaldy.