QR Mádenıet jáne sport mınıstri Arystanbek Muhamedıuly RIA Bestnews.kz-ke Qytaıdyń Hýnan aımaǵynda ótkizilgen tanymal «I am a singer» án baıqaýyna qatysyp, kózge erekshe túsken Dımash Qudaıbergen jaıly suhbat beripti.

«Bul, keremet jetistik. Dımash úshin óte qýanyshtymyn. Ol kóptegen konkýrstardyń laýreaty, 2015 jyly «Slaván bazarynda» jeńis tuǵyryna kóterildi. Munyń bári kezdeısoqtyq emes. Dımash ónerli otbasynda dúnıege keldi. Qanat pen Svestlana Aıtbaevtar elimizdegi ataǵy shyqqan, syı-qurmetke ıe shyǵarmashylyq otbasy. Qanat el aýzynda júrgen kóptegen ánderdiń avtory. Búgingi kúni ol Aqtóbe oblysynyń Mádenıet basqarmasynyń basqarýda. Svetlana bolsa, joldasymen birge jup bolyp sahnaǵa shyǵyp, kórermenderdi súısintip, án oryndaýda. Balalary Dımash erekshe mýzykant. Únemi izdenis ústinde. Qazirgi tańda biz oǵan operalyq baǵdarlama daıyndap jatyrmyz. Sony sımfonıalyq orkestrdiń súıemeldeýimen oryndaıtyn bolady. Dımashtyń bolashaǵy jarqyn. Áli bıik-bıik belesterdi baǵyndyratynyna senimdimin.

Búginde BAQ qytaılar Dımashty ekinshi Vıtas dep aıtty dep shýlap jatyr. Óz basym Vıtastyń shyǵarmashylyǵymen tanystym. Onyń birshama ýaqyt boıy Qytaıda turyp, sol jaqta óner kórsetip júrgenin bilemin. Sondyqtan da qytaılar Vıtasty óte jaqsy tanıdy. Alaıda Dımash Qudaıbergen qaıtalanbas dara ánshi. Aqtóbeniń mýzykalyq ýchılıshesin bitirgen, qazir Astanadaǵy Qazaq ulttyq óner ýnıversıtetiniń stýdenti.

Dımash bul jetistikke daıyn boldy. Birneshe jyl boıy ony syrttaı baqylap kelemin. Ony basqa ánshilermen salystyrýdyń qajeti joq. Ol bıik notalardy bireý uqsaımyn dep alyp jatqan joq. Onyń daýys dıapazony keń. Bul qudaı bergen talant. Bıik notany alamyn dep Dımash qara terge túspeıdi. Dımash ekinshi Vıtas emes, qysqasy. Bul Býrabaıdy Shveısarıamen salystyrýmen teń. Jalpy, bireýdi bireýmen salystyratyn psıhologıadan arylýymyz qajet.Shveısarıa da kórkem memleket, alaıda Býrabaıdyń jóni bólek. Kezinde biz IýNESKO delegasıasyn qonaq retinde kútip alyp, Býrabaıdy kórsetkende eshkim ony Shveısarıamen salystyrǵan emes. Sheteldikter tańdaılaryn qaǵyp, «netken ǵajap jer, mundaı sulýlyqty esh jerden kórmedim» dep tarqasty. Bizdiń Gennadııdi únemi bireýmen salystyryp jatady. Golovkın qaıtalanbas boksshy ekenin túsinetin kez jetti ǵoı» deıdi Arystanbek Muhamedıuly.