«Qamshy» portaly qazaqtyń ónerli, isker azamattaryn úzbeı jurtqa tanystyryp, dáriptep keledi. Solardyń biri Qazaq qol ónerin zaman talabyna saı damytýǵa atsalysyp júrgen baýyrlarymyzdyń biri – Nurdyn Turǵyn bolatyn. Ol «Qamshy» oqyrmandaryna jaqsy tanys, jylǵa jýyq ýaqyt buryn onyń esimi «Qamshy» portaly arqyly Atajurtyna tanylǵan bolatyn.
3 jyldan beri «Muraǵat» atty saýda belgisimen Qytaı qazaqtary arasynda túrli ulttyq ónimder óndirip keledi. Nurdyn Turǵyn «Muraǵat» kompanıasynyń dırektory. Munda qazaqtyń ulttyq kıiminen bastap, ózge de buıymdary ulttyq naqyshpen kómkerilip, kópke jol tartady. Seriktestiktiń ónimderi de suranysqa ıe. Arǵy bette qazaq qolónerin nasıhattap júrgen sol seriktestiktiń bas meńgerýshisi Nurdynnyń ápkesi Gúlmıra Turǵynqyzy. «Muraǵat» kompanıasy esimin ápkeli-inili Turǵyn analarynyń qurmetine qoıǵan, «Anamyz kishkene kezinen ulttyq kıim-keshek tigetin ismer kisi edi» deıdi olar. Al, Muraǵat kompanıasynyń Qazaqstandaǵy ókili Saıabek Salıaqyn.
Qulja qalasynda ornalasqan Kompanıa qazir 180 adamǵa jumys berip otyr. 2015 jyly bılik olardyń iskerligin baǵalap, kásipkerlikti damytýǵa qoldaý retinde 2 mıllıon ıýanǵa(shamamen 300 myń AQSH dollary) jumys isteıtin úlken zaýyt salyp bergen. İskerlik zaýyty sońǵy úlgidegi tehnologıalyq jabdyqtarmen qamtylǵan.
Muraǵat kompanıasy jaqynda jańa tapqyrlyqty naryqqa qosty. Kez-kelgen adamnyń turmystyq qajetine jaraıtyn buıym fýnksıasy bólek tyrnaqalǵysh.
Qazaqstanǵa ónimin tanystyra kelgen Nurdyn Turǵyn Almatyǵa joly túsken sátinde, «Qamshy» portalyna arnaýly suhbat berip, iskerliginiń qyr-syrymen bólisti.
«Meniń ınternet arqyly istegen jumystarym óte jaqsy boldy, isimizdiń alǵa ilgerileýine birshama yqpal etti», - dep ǵalamtordyń artyqshylyǵyn paıdalana bilý qajettigimen bastady áńgimesin Nurdyn Turǵyn.
Ol 2015-jylǵy Qytaıdaǵy «Internetten kásiptengen jas juldyz kásipker baıqaýynda» júldeger bolǵan. Sodan bastap kóptegen básekelerge qatysqan qandasymyz aımaqtyq «jańalyq jaratý jáne kásip ashý» básekesinde 600 nysannyń ishinde 60 myqtynyń qatarynda kóringen. Sondaı-aq, búkil Qytaılyq «Jas kásipkerlerdiń jańalyq jaratý» jáne kásip ashý jarysynda 150 myqtynyń qatarynan boı kórsetken. Sonymen qatar 2016 jyly Shyńjań boıynsha «Jastar birlestiginiń múshesi» bolyp quryltaıǵa qatysty. Ári, Shyńjań dárejeli jas kásipkerler birlestiginiń múshesi bolyp bekitilgen.
«Osyndaı baıqaýlarǵa qatysyp júrip, kóptegen bilim ordalarynda, aýyldarda talantty jastardyń, iske qabiletti qoldaýdy qajet etetin qandastardyń kóp ekenin baıqadym. Sodan kompanıa atynan Joǵary oqý oryndarynda bilim alyp, ári kásiptenýge bet alǵan, ózinde talanty bar, qolynda jańa buıymy, ıdeıasy bar jastarǵa qoldaý kórsetýdi maqsat tuttym. Jasampazdyqtaryn, jetistikterin, ónimderin naryqqa shyǵaryp berýdi oılap, ary sol jobany qolǵa alǵan edim», - deıdi Nurdyn Turǵynuly.
«Qamshy» portaly arqyly jurtshylyqqa tanystyrǵaly otyrǵan buıym onyń osylaı «Bulaq kórsek kózin ash» dep bastaǵan ıgi isi aıasynda tapqyrlanǵan.
«Nıetińe qaraı beredi demekshi. Joǵary mektepte oqyp jatqan Ershat esimdi jigit habarlasty. «Osyndaı meniń bir ónimim bar bazarǵa salaıyn desem markam joq, seriktigim joq, sony kómektesseńiz, seriktigińizdiń atynda osy jumysty istesem» dedi. Sodan qoldaý kórsettim, ol jigittiń shyǵarǵany edi», - dep ózindik artyqshylyǵy bar tyrnaqalǵyshty tanystyrdy Nurdyn Turǵyn.
Tazalyqty dáripteıtin tyrnaqalǵyshtyń qaltasy bar. Ortany qorǵaıtyn tamasha ónim «Muraǵat» markasyn ıelenip naryqqa shyqqan. Tyrnaqty alǵanda tyrnaq shashyramaıdy, alynǵan tyrnaq qaldyqtary qosymsha qaltaǵa jınalady. Árıne alyp bolǵan soń qaýipsiz jerge kómip tastaýǵa bolady.
Muraǵat seriktiginiń saýda isteý kólemi keń, eń basty ónimderi qazaqı ulttyq kıim-keshek, qolóner men keste buıymdary ekenin joǵaryda da jazdyq. Nurdyn Turǵyn musylmandar úshin ózindik artyqshylyǵy men paıdasy bar «Muraǵat tyrnaq alǵyshyn búkil Qazaqstanǵa tanystyrsam deıdi. Sondaı-aq úsh jyldan beri Qytaıda jemisti eńbek etip, ózindik saýda belgisimen tanylǵan «Muraǵat» kompanıasyn Qazaqstanǵa da jumys istetkisi keledi. Óndirisin Atajurtta da qolǵa alyp, sheteldik tájirıbesin paıdalansam deıdi.
Erlan Tóleýbaı
