Pavlodarda Ýnıversıada alaýyn jaǵýǵa daıyndyq kezinde ctýdent betin kúıdirip aldy, - dep habarlaıdy Tengrinews.kz tilshisi. 

Bakıjan Kákimov esimdi ekinshi kýrs stýdentiniń zardap shekkeni belgili boldy. Stýdenttiń aıtýynsha, tótenshe jaǵdaı Pavlodardaǵy memlekettik ýnıversıtette Ýnıversıada alaýyn jaǵýǵa daıyndyq kezinde bolǵan.

"Ýnıversıadany ashý rásimine bir saǵat qalǵanda, alaýdy qalaı jaǵý kerektigin taǵy bir ret tekserip shyǵý úshin daıyndyqty bastadyq. Senarı boıynsha, men Sultanmahmut Toraıǵyrovtyń rólin oınaımyn. Sol sátte men alaýǵa qaraı eńkeıip edim, ot lap etip, betimdi kúıdirip jiberdi. Birden basymdy tartyp qaldym, qatty aýyrdy", - dedi stýdent.

Alǵan kúıigine qaramastan pavlodardyq jigit kórinistegi rólin sońynan deıin somdap shyqty.

"Men jedel járdemdi shaqyrǵan joqpyn, qoıylymdy toqtatqym kelgen joq. Baǵdarlama aıaqtalǵan soń dostarym meni aýrýhanaǵa apardy", - dedi stýdent.

Jigittiń aıtýynsha, ol qatty kúıik almaǵan. Eń bastysy kózine zaqym tımegen.

"Munda eshkim kináli emes. Men alaýdyń qasyna ózim baryp jaqyndadym. Ony eshkim de baıqamady", - dedi zardap shekken stýdent.