Qýǵyndaǵy burynǵy bankır ári opozısıalyq olıgarh Muhtar Áblázovtiń serigi, Qazaqstan bıligi Túrkıadan aldyrdy delingen Jaqsylyq Jarymbetov óziniń Muhtar Áblázovtiń" qylmysyna qatysy baryn" joqqa shyǵaryp, tergeýge bolysatynyn málimdedi, dep habarlady Azattyq.
Búgin Astanada ótken baspasóz konferensıasynda Jaqsylyq Jarymbetov ózin 17 qańtar kúni Stambýldyń Sabiha Gokcen áýejaıynda polısıa "jalǵan pasport jasaý" aıybymen ustaǵanyn rastady. Biraq ol "Oılana kele polısıaǵa ózimniń kim ekenimdi aıttym. Qashýdan sharshadym" dedi. Ol budan soń polısıa Qazaqstan konsýldyǵyna habarlasýǵa ruqsat bergenin aıtty. Jarymbetovtiń sózinshe, ony Qazaqstan arnaıy qyzmeti ushaqpen elge aldyrǵan.
Jarymbetov baspasóz konferensıasynda "Áblázovtiń aınalasyndaǵy adamdardyń ózin burynǵy bankırmen baılanystyra aqparat taratyp jatqanyn" jáne otbasyna qysym kórsetýge tyrysyp jatqanyn aıtty. Onyń sózinshe, "Áblázovtiń adamdary óziniń Qazaqstanǵa jetkizilgenin saıasatpen baılanystyrǵysy keledi". Jarymbetov Áblázovpen birge jumys istegeni bolmasa oǵan qarsy qylmystyq iske qatysy joǵyn aıtty. Ol Áblázovpen qatar taǵylǵan "qarjylyq alaıaqtyq jasady" degen aıyptyń ózine qatysy joǵyn aıtyp, Qazaqstandaǵy tergeýmen tyǵyz jumys isteıtinin málimdedi.
25 qańtarda Open Dialog uıymy arnaıy málimdeme taratyp, Jaqsylyq Jarymbetovtiń Túrkıada júrgen jerinen "urlanǵanyn" habarlaǵan. Polshada ornalasqan quqyq qorǵaý uıymy Jarymbetovtiń áıeli Aqmaral Jarymbetovaǵa silteme jasaı otyryp, burynǵy bankırdiń 17 qańtar kúni Stambýldaǵy Sabiha Gokcen áýejaıynda "esh negizsiz ustalǵanyn", "túrik bıliginiń oǵan advokat shaqyrýǵa mursha bermegenin", "keıin oǵan jalǵan tólqujat jasaý aıyby týraly habarlaǵanyn" jazǵan.
Open Dialog-tyń málimdemesine sáıkes "21 qańtarda Qazaqstannyń arnaıy qyzmeti Jarymbetovti Túrkıadan charter ushaqpen syrtqa alyp shyqqan". Áıeliniń sózinshe, Jarymbetov oǵan bir márte telefon soǵyp, "úshinshi bir eldemin" dep aıtyp úlgergen. Túrkıa men Qazaqstannyń tıisti organdarynan ázirshe komentarı alý múmkin bolmady.
