«BTA Banki» AQ basqarmasy basshysynyń burynǵy orynbasary Jaqsylyq Jarymbetovtyń aıtýynsha, osydan 8 jyl buryn bastalǵan qylmystyq is kezinde úreı-qorqynysh boldy. Sol sebepti Jarymbetov birden boı tasalap ketti. Al Ábilázov úshin onyń elge oralǵany tıimsiz boldy.
«Shynymdy aıtsam, men ózim qatty qoryqtym. Bul jaqta tergeýge túsken adamdy qınaıdy, zorlyq-zombylyq kórsetedi, tipti óltiredi dep aıtqannan keıin kez kelgen adam úreılenedi. Árıne, Ábilázovtyń ózi shoqty kósep otyrdy. Oǵan meniń osy jaqqa kelgenim tıimsiz boldy dep oılaımyn. Iá, sol kezde qorqynysh boldy. Men otbasym úshin, balalarym úshin alańdadym», - deıdi Jarymbetov.
Onyń aıtýynsha, bas kezinde ol Ulybrıtanıada boı tasalap júrdi. Odan keıin Eýropany kezip, Túrkıaǵa bardy. Aqsha jaǵynan Ábilázovtyń nemese onyń adamdary kómektesti. Oǵan qosa, Jarymbetovtyń óz jınaqtary bolǵan.
Búginde «BTA Banki» AQ basqarma basshysynyń burynǵy orynbasary óz kinásin moıyndap otyr. Alaıda ol qylmysty qasaqana jasadym dep sanamaıdy. Sebebi sol kezde basshylyqtyń buıryǵyn oryndaýǵa týra keldi.
«Kez kelgen iste núkte qoıǵan durys qoı. Onsyz basqa adamdar qınalyp júre beredi. Buǵan deıin beımálim bolyp kelgen detaldardy ashý qajet. Ashyǵyn aıtaıyn, qazirgi kezde men tergeýge kómek berýge kelistim. Osynyń arqasynda men buǵan deıin sottalǵan azamattardyń, shetelde áli kúnge deıi qashyp júrgenderdiń jazasyn jeńildetýge óz septigimdi tıgizemin dep senemin», - dep atap kórsetti Jarymbetov.
Aıta keteıik, búgin Jarymbetov arnaıy baspasóz máslıxatyn ótkizip, ózine qatysty taralyp jatqan alyp-qashpa áńgimelerdi joqqa shyǵardy. Onyń sózine qaraǵanda, qańtardyń 17-si kúni Túrkıanyń shekara qyzmeti ony jalǵan tólqujatpen júrgeni úshin ustaǵan bolatyn.
«Polısıa ýchaskesinde otyrǵanda men ózimniń shyn aty-jónimdi aıttym. Sosyn Ystanbuldaǵy Qazaqstannyń resmı ókildiligine xabarlasýdy ótindim. Sóıtip, qańtardyń 20-sy kúni meni Qazaqstanǵa ekstradısıalady. Ertesinde meni tergeý abaqtysyna qamady. Osy ýaqytqa deıin sonda boldym. Maǵan eshqandaı zorlyq-zombylyq pen qysymnyń jasalmaǵanyn málimdegim kelip otyr», - deıdi ol.
